ვინ ამბობს იმას, რასაც „ქართული ოცნების“ ლიდერები არასდროს ამბობენ?

23/10/2023

ავტორი: ხატია შამანაური

„ქართული ოცნების“ ლიდერების ათასობით განცხადების ანალიზმა თუ აჩვენა, რომ მათი ანტიდასავლური რიტორიკა მკაცრად თანმიმდევრულია, ხოლო როლები - სტრატეგიულად გადანაწილებული, ეს დიდი სურათის მხოლოდ ერთი ნაწილია. არის გზავნილების ისეთი ფორმულირებები, რომელსაც პირდაპირ არასდროს იყენებს ხელისუფლება, მაგრამ ხშირად ვისმენთ მასთან დაკავშირებული პირებისგან. ამ შემთხვევაშიც კომენტარები თანმიმდევრულად, ორგანიზებულად ვრცელდება და ხელისუფლების პოზიციას გამოხატავს.

2022 წლის 24 თებერვლიდან (უკრაინაში რუსეთის სრულმასშტაბიანი შეჭრიდან) 2023 წლის 24 ივლისამდე ,,იმედინიუსის“ ვებსაიტზე გამოქვეყნებული ყველა ახალი ამბის სათაური და ლიდი მოვაგროვეთ, პროგრამული ენის ,,პითონის“ გამოყენებით, ამ მონაცემების დამუშავების საფუძველზე წარმოგიდგენთ მომდევნო სტატიის თემას - ხელისუფლებასთან დაკავშირებული ჯგუფების ანტიდასავლური გზავნილები. 58 802 ახალი ამბის გააანალიზების შემდეგ გაჩვენებთ, რა ტიპის გზავნილებს ავრცელებენ ეს პირები და როგორ მიდის მათი სათქმელი მოსახლეობამდე.

უკრაინაში ომის დაწყებიდან მალევე რუსულ მედიაში აქტიურად გაჩნდა გზავნილი, რომ ევროპაში საგანგაშო სოციალურ-ეკონომიკური ვითარება იყო. ეს თემა მალევე პოპულარული გახდა საქართველოშიც. არაერთმა ადამიანმა აქტიურად დაიწყო მანიპულაციურად იმის განხილვა, რომ ეკონომიკური ზრდა საქართველოში ევროკავშირის წევრი ყველა სახელმწიფოს ეკონომიკური ზრდის მაჩვენებლებს აჭარბებდა, რომ საქართველოს წარმატებას „მშვიდობა“ უზრუნველყოფდა, ხოლო მშვიდობა „ქართული ოცნების“ დამსახურება იყო.

წელიწადისა და 5 თვის განმავლობაში ბევრ სხვადასხვა ტიპის ანტიდასავლურ გზავნილს ვისმენდით. მუდმივად ჩნდებოდა ახალი შინაარსი გარემოებებისა და მოვლენების განვითარების შესაბამისად. ამ გზავნილების გავრცელებისა და მოსახლეობამდე მიტანის ორგანიზებული გზა და ხერხები კი არ შეცვლილა.

ყოველ ჯერზე, როდესაც საჭირო ხდებოდა რაიმე გზავნილის მოსახლეობამდე მიტანა, ,,იმედინიუსის“ პლატფორმაზე დილის საათებში ქვეყნდებოდა ზოგადი ახალი ამბავი, ხოლო მთელი დღის განმავლობაში სხვადასხვა პირი ამ თემაზე ერთი და იმავე შინაარსის კომენტარს აკეთებდა, ხელისუფლებასთან დაკავშირებული ექსპერტები და პოლიტიკოსები საზოგადოებას მუდმივად ერთსა და იმავეს უმეორებდნენ.

მაგალითად, 2022 წლის 4 სექტემბერს, დილის 7 საათზე ,,იმედინიუსზე’’ გამოქვეყნდა, რომ ჩეხეთში მრავალათასიანი აქცია გაიმართა - „შეკრებილების ერთ-ერთი მოთხოვნა უკრაინის საკითხზე ნეიტრალიტეტი იყო“, - წერდა იმედინიუსი.

დღის განმავლობაში კი ნინო ფოჩხუა, ვატო შაქარიშვილი და სხვები პრაღაში გამართულ აქციას ეხმაურებოდნენ და ამბობდნენ, რომ სწორედ ეს იყო ნამდვილი ევროპული ღირებულება და არა უკრაინისთვის მხარდაჭერა, ამომრჩევლებს არწმუნებდნენ, რომ ეს საპროტესტო ტალღა მთელ ევროპას მოედებოდა.

10 მაისს, როდესაც რუსეთმა საქართველოს მოქალაქეებისთვის სავიზო რეჟიმი გააუქმა, პუტინის გადაწყვეტილებას საქართველოში დიდი ვნებათაღელვა მოჰყვა. ამის საპასუხოდ ანტიდასავლურმა გზავნილებმაც არ დააყოვნა. 12 მაისს დილიდან არაერთი ადამიანი ,,იმედინიუსის“ პლატფორმიდან რიცხვებით გვიყვებოდა ევროკავშირისა და შეერთებული შტატების სავაჭრო ბრუნვის შესახებ რუსეთთან.