2025 წლის ოქტომბერში საქართველოში ფულადი გზავნილის სახით 318.71 მლნ აშშ დოლარი (დაახლოებით 865.6 მლნ ლარი) გადმოირიცხა, რაც 13.4%ით (37.6 მლნ აშშ დოლარით) მეტია 2024 წლის ოქტომბრის ანალოგიურ მაჩვენებელზე.
საქართველოს ეროვნული ბანკის (სებ) ინფორმაციით, უცხოეთიდან საქართველოში ფულადი გზავნილების 96.4% იმ 26 უმსხვილეს პარტნიორ ქვეყანაზე მოდის, საიდანაც გზავნილების მოცულობა ოქტომბერში თითოეულზე 1 მლნ. აშშ დოლარს აღემატებოდა.
სებ-ის მონაცემებით, მხოლოდ ევროკავშირის ქვეყნებიდან საქართველოში გზავნილის სახით 143.26 მილიონი აშშ დოლარი ჩაირიცხა, ხოლო დანარჩენი 175.45 მილიონი – სხვა დანარჩენი ქვეყნებიდან.
ეროვნული ბანკის მონაცემების მიხედვით, 2025 წლის ოქტომბერში ყველაზე მეტი თანხა საქართველოში შემდეგი ქვეყნებიდან ჩაირიცხა:
აშშ – 59.27 მილიონი აშშ დოლარი;
იტალია – 53.17 მილიონი აშშ დოლარი;
რუსეთი – 41.32 მილიონი აშშ დოლარი;
გერმანია – 29.61 მილიონი აშშ დოლარი;
საბერძნეთი – 25.81 მილიონი აშშ დოლარი;
ისრაელი – 24.06 მილიონი აშშ დოლარი;
თურქეთი – 10.71 მილიონი აშშ დოლარი;
ესპანეთი – 7.92 მილიონი აშშ დოლარი.
სებ-ის ინფორმაციით, 2025 წლის ოქტომბერში საქართველოდან საზღვარგარეთ 40.8 მლნ აშშ დოლარი (110.9 მილიონი ლარი) გადაიგზავნა, რაც 2024 წლის ოქტომბრის (35.7 მლნ აშშ დოლარი) ანალოგიურ მაჩვენებელთან შედარებით 14.5% მეტია.
