23 ოქტომბრიდან დედაქალაქში დამატებით 54 ახალი მიკროავტობუსი და „ისუზუს“ მარკის 8-მეტრიანი 38 ავტობუსი იმოძრავებს, – ამის შესახებ თბილისის მერმა, კახა კალაძემ დედაქალაქის მთავრობის სხდომაზე განაცხადა.
კახა კალაძემ საზოგადოებრივი ტრანსპორტის მიმართულებით, უახლოეს დღეებში დაგეგმილი სიახლეებისა და ახალი მარშრუტების ამოქმედების შესახებ ისაუბრა.
„დღის განმავლობაში, მუნიციპალურ ტრანსპორტს, დაახლოებით, 40 000 მგზავრი გადაჰყავს და დარწმუნებული ვარ, ეს რიცხვი მომდევნო წლებში გაიზრდება, რადგან გვეყოლება ყველაზე მოწესრიგებული, განახლებული საზოგადოებრივი ტრანსპორტი. მომავალ წელს ვაპირებთ 18-მეტრიანი ავტობუსების შეძენას. დედაქალაქს 200 ერთეული 18-მეტრიანი ავტობუსი სჭირდება, რომლებიც კონკრეტულ ხაზებზე იმოძრავება“, – განაცხადა კახა კალაძემ.
რაც შეეხება ახალი მარშრუტების სქემას, 23 და 28 ოქტომბერს ამოქმედდება ავტობუსის ახალი მარშრუტები – N319 და N330. ასევე, N32 მარშრუტზე მოძრავი MAN-ის მარკის ოთხი ერთეული ავტობუსი ჩანაცვლდება BMC-ის მარკის ხუთი ერთეული ავტობუსით; N54 მარშრუტს მომსახურების გაუმჯობესების მიზნით, დაემატება სამი, ხოლო N15 მარშრუტს დაემატება MAN-ის მარკის ერთი ავტობუსი.
გარდა ამისა, N403 მარშრუტს დაემატება სამი ერთეული მიკროავტობუსი, რაც მგზავრთა მომსახურების ხარისხს გააუმჯობესებს. ასევე, ამოქმედდება მიკროავტობუსების ახალი მარშრუტები: N415, N430, N434, N438, N449, N450, N478, N481, N484, N485, N487.
