3 კოალიცია ევროპის საბჭოს საპარლამენტო ასამბლეის პრეზიდენტსა და საპარლამენტო ფრაქციებს მიმართავს, ასამბლეაში საქართველოს „საპარლამენტო” დელეგაციის უფლებამოსილება არ დადასტურდეს.
„კოალიცია ცვლილებისთვის”, „ერთიანობა – ნაციონალური მოძრაობა” და „ძლიერი საქართველო” წერილში წერენ, რომ „არჩევნების გაყალბების შედეგად ჩამოყალიბებული „პარლამენტი” და მის მიერ არჩეული „პრეზიდენტი” ლეგიტიმაციას მოკლებულნი არიან და დელეგაციაც, რომელიც „ქართულმა ოცნებამ” ასამბლეაში შეიძლება წარადგინოს, მხოლოდ თვითგამოცხადებული რეჟიმის წარმომადგენლებისგან შედგება.
„ძვირფასო პრეზიდენტო,
ჩვენ, საქართველოს პოლიტიკური პარტიების წარმომადგენლები, მოგმართავთ თხოვნით, ევროპის საბჭოს საპარლამენტო ასამბლეაში არ დაადასტუროთ საქართველოს დელეგაციის უფლებამოსილება, რადგან 2024 წლის 26 ოქტომბრის საპარლამენტო არჩევნები ჩატარდა სერიოზული დარღვევებით, რაც ეწინააღმდეგებოდა საერთაშორისო სტანდარტებსა და ქართველი ხალხის ნებას.
არჩევნების გაყალბების შედეგად ჩამოყალიბებული „პარლამენტი” და მის მიერ არჩეული „პრეზიდენტი” ლეგიტიმაციას მოკლებულნი არიან. დელეგაციაც, რომელიც „ქართულმა ოცნებამ” ასამბლეაში შეიძლება წარადგინოს, მხოლოდ თვითგამოცხადებული რეჟიმის წარმომადგენლებისგან შედგება.
მნიშვნელოვანია ასევე აღინიშნოს, რომ „ქართული ოცნების” ლიდერები, მათ შორის, ბიძინა ივანიშვილი, საერთაშორისო სანქციების ქვეშ არიან – ისინი პასუხისმგებლები არიან ქვეყნის დემოკრატიული რეგრესისა და ადამიანის უფლებების მასობრივი დარღვევების ორგანიზებაზე. საქართველოში მშვიდობიანი პროტესტების მონაწილეთა მიმართ ხორციელდება რეპრესიები, დაკავებები და ძალადობა, რაც კიდევ უფრო აღრმავებს კრიზისს.
ჩვენი მოთხოვნებია:
- ყველა პოლიტიკური პატიმრის დაუყოვნებლივ გათავისუფლება;
- ახალი, თავისუფალი და სამართლიანი არჩევნების ჩატარება.
გთხოვთ, გაითვალისწინოთ, რომ „ქართული ოცნება” არ შეიძლება იყოს სანდო პარტნიორი, რადგან მან არაერთხელ დაარღვია ადრე შეთანხმებული ვალდებულებები და პასუხისმგებელია საქართველოში დემოკრატიული ჩარჩოს სისტემურ და კარგად დაგეგმილ ეროზიაზე.
როგორც ჩვენს ერთობლივ განცხადებაშია ნათქვამი, ერთადერთი ეფექტური გამოსავალი საქართველოს დემოკრატიული ტრაექტორიის აღდგენისა და ევროპული ღირებულებებისადმი ერთგულების უზრუნველსაყოფად არის ახალი საპარლამენტო არჩევნების ჩატარება თავისუფალ, სამართლიან და გამჭვირვალე პირობებში.
ევროპის საბჭოს საპარლამენტო ასამბლეის პრინციპული პოზიცია გადამწყვეტია დემოკრატიული ღირებულებების დასაცავად საქართველოში”, – ნათქვამია განცხადებაში.
