საკოორდინაციო საბჭოს სხდომის დასრულების შემდეგ დაავადებათა კონტროლის ეროვნული ცენტრის ხელმძღვანელმა, ამირან გამყრელიძემ ჟურნალისტების შეკითხვებს უპასუხა.
ვაქცინების ეფექტურობასთან დაკავშირებით დასმულ შეკითხვაზე, ამირან გამყრელიძემ განაცხადა, რომ ყველა ვაქცინამ აჩვენა მთავარი – ის იცავს ადამიანს დაავადების ყველაზე რთული განვითარებისგან.
„ყველა კვლევამ აჩვენა, ეს ყველა ვაქცინა, რომელიც დღეს ადმინისტრირდება მსოფლიოში, დაახლოებით 14 ვაქცინა არის უკვე, რომელიც გამოიყენება. 8 გამოიყენება საერთაშორისო მასშტაბით და დანარჩენი ეროვნული მასშტაბით, ანუ გარეთ არ გადის.
ყველა ვაქცინამ აჩვენა ის მთავარი… სხვადასხვა პროცენტით, რა თქმა უნდა, და „სინოვაკზეც“ არის ეს პროცენტები. დაახლოებით 80%-მდე აქვს მას ჰოსპიტალიზაციისგან დაცვა და 95%-მდე, ცოტა მეტი სიკვდილიანობის პრევენცია.
ასე რომ, მე ხშირად ვიმეორებ და ვეყრდნობი ფაუჩის ციტატებს, რომ დღეს გამოიყენეთ ის ვაქცინა, რაც გაქვთ, რადგან ის ვაქცინა იცავს ყველაზე უფრო რთული განვითარებისგან”, – განაცხადა ამირან გამყრელიძემ.
