ადამიანის უფლებების დაცვის კომიტეტზე ომბუდსმენობის კიდევ ერთ კანდიდატს, ქეთევან ჩაჩავას უსმენენ.
უმრავლესობის დეპუტატმა დავით მათიკაშვილმა მას ევროინტეგრაციის პროცესისა და ამ პროცესში სამოქალაქო სექტორის წარმომადგენლების განცხადებების შესახებ რამდენიმე შეკითხვა დაუსვა.
მისი შეკითხვების საპასუხოდ ქეთევან ჩაჩავამ „ქართული ოცნება“ NGO-ების მისამართით გაკეთებული განცხადებებისთვის გააკრიტიკა. მისი თქმით, არ შეიძლება, დემოკრატიულ სახელმწიფოში ადამიანის განსხვავებული პოზიციის გამო უწოდო მოღალატე.
„მოღალატეზე, იმ არამეგობრული გარემოს შექმნა სამოქალაქო აქტივისტების მიმართ, რომელსაც ვხედავთ ბოლო პერიოდში, განცხადებები, რომელიც მაღალი ტრიბუნიდან კეთდებოდა, ძალიან სამწუხარო იყო და არ შეესაბამებოდა მთავარ პრინციპებს, სადაც ჩვენი ქვეყანა მიდის“, – განაცხადა ჩაჩავამ.
ჩაჩავას ამ განცხადებას წინ უძღოდა დავით მათიკაშვილის შეკითხვა, იმსახურებდა თუ არა საქართველო ევროკავშირის კანდიდატის სტატუსს, რაზეც ჩაჩავამ უპასუხა, რომ მისი პირადი პოზიციით, იმსახურებდა. ამას კი მოჰყვა შეკითხვა „ღია საზოგადოების“ ევროინტეგრაციის პროგრამის ხელმძღვანელის, ვანო ჩხიკვაძის თანაავტორობით მომზადებული მასალის შესახებ.
დეპუტატი მათიკაშვილი დაინტერესდა, როდესაც „კეთდება კვლევა და ამ კვლევაზე დაფუძნებული განცხადებები, რომ საქართველო არ იმსახურებს სტატუსს, რამდენად ადეკვატურია“.
ქეთევან ჩაჩავას თქმით, ვანო ჩხიკვაძე არის სამოქალაქო აქტივისტი და „ევროინტეგრაციის ერთ-ერთი ყველაზე გულანთებული მხარდამჭერი საქართველოში“.
ომბუდსმენობის კანდიდატი განმარტავს, რომ სტატია, რომლის შესახებაც დეპუტატმა შეკითხვა დასვა, მომზადებული იყო დასავლელი ექსპერტის თანაავტორობით და მასში საუბარი არ იყო იმაზე, რომ საქართველო არ იმსახურებს კანდიდატის სტატუსს.
„სტატიაში საუბარი იყო იმაზე, რომ სავარაუდოდ, საქართველოსთან მიმართებით მოხდება ის, რაც მოხდა ბოსნიის შემთხვევაში და საქართველოს მიენიჭება კანდიდატობის შესაძლებლობა კონკრეტული ვალდებულებების შესრულების შემდეგ“, – განაცხადა ჩაჩავამ.
მისი თქმით, სტატია როცა დაიდო, საზოგადოების უმრავლესობამ მისი წაკითხვის გარეშე გააკეთა აქცენტი, თითქოს ვანო ჩხიკვაძე ამბობს, რომ საქართველო არ იმსახურებს კანდიდატის სტატუსს.
ევროინტეგრაციის პროცესში სახელმწიფოს მიერ გადასადგმელ ნაბიჯებზე საუბრისას ჩაჩავამ ასევე აღნიშნა, რომ შეფასებს პროცესში ხელისუფლებას უფრო მეტის გაკეთება შეეძლო ვიზიტების და ნების გამოხატვის კუთხით.
„მე, როგორც მოქალაქე, ვფიქრობდი, რომ შეიძლებოდა მეტის გაკეთება თუნდაც ადვოკატირების, ლობირების, ნების აქტიურად გამოხატვის ნაწილში“, – განაცხადა ჩაჩავამ, რომელმაც თქვა, რომ ევროინტეგრაციის მხარდასაჭერ ყველა აქციაზეა ნამყოფი.
მისივე თქმით, სამოქალაქო სექტორი პროცესში მაქსიმუმს აკეთებს და საზოგადოებას იგივე მოლოდინი აქვს ხელისუფლებისგან.
დეპუტატმა მიხეილ სარჯველაძემ ჩაჩავას დიპლომატიურ კორუპსზე თავდასხმებთან დაკავშირებით გაკეთებულ განცხადებაზე ჰკითხა: „რაში ხედავთ ბულინგს, დეზინფორმაციას, თავდასხმა რატომაა? თუ მეტყვით ინფორმაციას, რომელიც სიმართლესთან შეუსაბამოდ გავრცელდა?“
„მათ შორის, დასვლელ პარტნიორებს, რომლებმაც ყველაფერი გაააკეთეს იმისთვის, რომ საქართველოში იყოს მშვიდობა და განვითარება, ჩვენ ამ ჭრილში იყო საუბარი, რომ სურდათ საქართველოს ომში ჩათრევა“, – განაცხადა ჩაჩავამ, რაზე სარჯველაძემ უპასუხა, რომ ასე კონკრეტულად არ თქმულა და იყო საუბარი, რომ დასავლეთში, შესაძლოა, ვინმეს სურდა ეს.
„მე ამ შემთხვევაში, დავაზუსტებ, რას ვგულისხმობდი, მათ შორის, კელი დეგნანსა და ჰარცელთან მიმართებით ეს არ იყო განზოგადებული, ეს იყო კონკრეტული“, – თქვა მან.
ხელისუფლების მხრიდან არასამთავრობოებზე თავდასხმის შესახებ ომბუდსმენობის კანდიდატს ჰკითხა „ლელოს“ წევრმა ანა ნაცვლიშვილმაც.
ოპოზიციონერი დეპუტატი დაინტერესდა, რა არის ხელისუფლების მიზანი, როდესაც ყალბი ინფორმაციით თავს ესხმის NGO-სექტორს.
ქეთევან ჩაჩავას განცხადებით, არამეგობრული გარემო, რომელიც იქმნება სამოქალაქო სექტორისა და მედიის წარმომადგენლებისთვის, ცუდი ტენდენციაა.
„როდესაც ამას სისტემური ხასიათი ეძლევა, როდესაც ხდება მაღალი ტრიბუნის გამოყენება, რა თქმა უნდა, ეს არ არის ჯანსაღი პროცესი და მნიშვნელოვანია ისიც, რომ ამ პროცესში დეზინფორმაცია და ვსაუბრობდით ანტიდასავლური პროპაგანდის ელემენტებზე, ვახსენეთ, რომ დემონიზაცია რა თქმა უნდა ამ სექტორის არის დიდი შეცდომა და სამწუხარო. ეს არ არის პოზიტიური ნაბიჯები, არ არის ეს გზა დემოკრატიის გამყარებისკენ და იმედი მაქვს, მსგავსი რიტორიკა შეწყდება“, – განაცხადა ჩაჩავამ.
