საქართველოს მესამე პრეზიდენტი მიხეილ სააკაშვილი წერს, რომ მისი აზრით მიამიტობაა ფიქრი, პროგრესი რიგგარეშე საპარლამენტო არჩევნებისა და გარდამავალი ეროვნული თანხმობის მთავრობის გარეშე მიიღწევა.
„პოლიტიკოსებს სჭირდებათ მეტი რწმენა საკუთარ თავში და ხალხის გამარჯვებაში. ახლა ივანიშვილის მთავარი ამოცანაა სწორედ რიგგარეშე არჩევნებიდან სხვა თემებზე ყურადღების გადატანა.
მთლიანად ვიზიარებ გიორგი მარგველაშვილის პოზიციას. ყველას გვჭირდება დიალოგი და მოსმენა, ურთიერთშეთანხმება. ევროპარლამენტში უნდათ რაც შეიძლება სწრაფად იხილონ ახალი ქართული პატრიოტული პარლამენტი.
არ უნდა დაგვავიწყდეს, რომ ძალიან სახიფათო გეოპოლიტიკურ გარემოში ვიმყოფებით. ამიტომ, მოწინააღმდეგეზე უფრო ორგანიზებული, მოქნილი უნდა ვიყოთ და ხალხმა ხელიდან არ უნდა გაუშვას ინიციატივა“, – წერს სააკაშვილი.
პატიმრობაში მყოფი სააკაშვილი, რომელიც კლინიკა „ვივამედში“ მკურნალობს, ასევე წერს, რომ იზიარებს მეოთხე პრეზიდენტის გიორგი მარგველაშვილის მოსაზრებას, ოპოზიციის სააკორდინაციო საბჭოს შექმნის საჭიროებაზე.
„ვინაიდან არ ვგეგმავ ქართულ პოლიტიკაში მონაწილეობას, ნამდვილად არ მაქვს პრეტენზია, რომ ვფლობ ზუსტ რეცეპტს, მაგრამ ახლა პოლიტიკური მიმოხილვების დრო ნამდვილად არაა – ყველა მუდმივად უნდა ვეძებდეთ გამოსავალს და იმაზე მალე ვიპოვით, ვიდრე გვგონია.
აუცილებლად გვჭირდება საკოორდინაციო საბჭო. გვახსოვდეს ყველას, რომ ოლიგარქმა აირჩია წაგებული ბანაკი რუსეთის სახით და ესეც ამყარებს ხალხის პოზიციებს და აჩქარებს მის გამარჯვებას“, – წერს სააკაშვილი.
