პარლამენტის ჯანდაცვის კომიტეტზე დღეს პეტიციაზე იმსჯელეს, რომელიც აქონდროპლაზიის დიაგნოზის მქონე ბავშვებისთვის სახელმწიფოსგან მედიკამენტის დაფინანსებას ეხება.
პარლამენტის პრესსამსახურის ცნობით, კომიტეტი პეტიციას, რეგლამენტის შესაბამისად, შესაბამის უწყებას გადაუგზავნის, კომიტეტი კი მის აღსრულებაზე ზედამხედველობას განახორციელებს.
„წინ მიდის საქმე”, – ასე ეხმაურება სოციალურ ქსელში აქოდროპლაზიის დიაგნოზის მქონე ბავშვის დედა მაკუნა გოჩიაშვილი. მისივე ცნობით, 15 მაისს საბჭო მორიგი სხდომა გაიმართება ჯანდაცვის სამინისტროში და მას ისევ 4 მშობელი დაესწრება.
რეგლამენტის მიხედვით, პეტიციაზე კომიტეტი იღებს ერთ-ერთ შემდეგ გადაწყვეტილებას:
ა) მიზანშეწონილად მიიჩნევს პეტიციის უშუალოდ შესწავლასა და განხილვას;
ბ) პეტიციას შესაბამის სამინისტროს, სხვა უწყებას უგზავნის;
გ) მიზანშეუწონლად მიიჩნევს პეტიციის შესწავლასა და განხილვას.
სამინისტრო, სხვა უწყება 1 თვის ვადაში აცნობებს პასუხს პეტიციის ავტორს და შესაბამის კომიტეტს. შესაბამისი კომიტეტის თანხმობით ეს ვადა შეიძლება გაგრძელდეს არაუმეტეს 1 თვით.
