შინაგან საქმეთა სამინისტრომ გამოძება დაიწყო მოქალაქე მარიამ ჩხეიძის საქმეზე, რომელიც ამბობდა, რომ „ალტ-ინფოს” მხარდამჭერების მხრიდან მუქარის წერილებს იღებდა.
როგორც „პუბლიკას” შსს-ში განუცხადეს, გამოძიება სისხლის სამართლის კოდექსის 151-ე მუხლით დაიწყო, რაც მუქარას ითვალისწინებს.
როგორც მარიამ ჩხეიძემ „პუბლიკას“ უთხრა, საჯარო მუქარა TikTok-ის ვიდეოს კომენტარებში მიიღო. ვიდეო „ალტ-ინფოს“ საბანკო ანგარიშების დაბლოკვას შეეხებოდა. მისი თქმით, მომხმარებელი სახელით „კავკასიელი“ მას აგინებდა, უხამსად მიმართავდა და სიცოცხლის მოსპობით ემუქრებოდა.
მისივე თქმით, მსგავს შეტყობინებებს ერთი წელია იღებდა. მან „პუბლიკას“ უთხრა, რომ ყველაფერი დაიწყო „ალტ-ინფოს“ ერთ-ერთ Telegram-არხზე კომენტარებში კამათით, რის შემდეგაც, ჩხეიძის თქმით, შეტყობინებებში უხამსი ფოტოსურათები მიიღო.
მარიამ ჩხეიძე ვარაუდობს, რომ ყველაფრის უკან „ალტ-ინფოს“ არხის, „მსოფლიო პოლიტიკის“ ერთ-ერთი ადმინისტრატორი არსენ ფოფხაძე დგას.
მარიამ ჩხეიძე უწყებაში გამოკითხვაზე ორშაბათს იმყოფებოდა. მან შსს-ში „სქრინშოტებიც“ წარადგინა.
