ჩინეთმა საქართველოსთან უვიზო რეჟიმი აამოქმედა. მოქალაქეების ლიდერის, ალეკო ელისაშვილის თქმით, ჩინეთთან ნებისმიერი ნაბიჯი საფრთხილოა. ამბობს, რომ არ იცის, უვიზო რეჟიმს როგორი შედეგები მოჰყვება, კარგი თუ ცუდი.
„სიმართლე გითხრათ, ჩინეთთან ურთიერთობისას ნებისმიერი რამ მაშინებს. „ქართული ოცნება“ კი არის ძალიან გალაღებული და ამბობენ, რომ ძალიან კარგია. რა ვიცი, უვიზოდ რომ დაიძრან, ერთმა სოფელმა რომ გადაწყვიტოს, ჩამოვიდეს და ცოტა ხანი აქ დარჩეს, რას ვაკეთებთ მერე? ეს ნახევრად ხუმრობით, მაგრამ ხუმრობაც არაა. ჩინეთთან ნებისმიერი ნაბიჯი საფრთხილოა, „ქართულ ოცნებას“ რაც ახარებს, სიმართლე გითხრათ, იმაზე მე ცოტა გული მისკდება, რადგან არ ვიცი, უვიზო მიმოსვლა კარგი შედეგებით დამთავრდება თუ – ცუდით. ის განცდაც არ მაქვს, არიქა, მთელი საქართველო ელოდება, უვიზო გახდეს მიმოსვლა, რომ გაიქცნენ ჩინეთში, რაღაც გააკეთონ, მაგრამ პირიქით რომ მოხდეს, ეს ნამეტანი საშიშია. შეიძლება წაადგეს, შეიძლება – არა. კიდევ ერთხელ ვამბობ, ერთი ციდა საქართველოს ურთიერთობა ამხელა, უშველებელ ჩინეთთან, რომელსაც აშკარად ძალიან გამოკვეთილი პოლიტიკური და გეოპოლიტიკური ინტერესები აქვს, აშკარად მსოფლიო ლიდერობისთვის იბრძვის, ასეთ ქვეყანას გვერდზე რომ უდგები, მთლად თანაბარი ხალხი არ ვართ, შესაბამისად, ყველაფერი ძალიან ფრთხილად ასაწონ-დასაწონია”, – ამბობს ელისაშვილი.
საქართველოს პრემიერ-მინისტრმა, ირაკლი კობახიძემ დღეს მთავრობის სხდომაზე თქვა, რომ ჩინეთში საქართველოს მოქალაქეებისთვის უვიზო მიმოსვლის რეჟიმი ამოქმედდება, რაც კობახიძის თქმით, იმას ნიშნავს, რომ საქართველოს მოქალაქეები ჩინეთში უვიზოდ შეძლებენ დაყონ 30 დღე ზედიზედ.
კობახიძემ ამ გადაწყვეტილებას „უმნიშვნელოვანესი” უწოდა”.
