ამერიკის შეერთებული შტატების სახელმწიფო მდივნის, ენტონი ბლინკენის მრჩეველი, ტომ სალივანი ამბობს, რომ იმ შემთხვევაში, თუ „ქართული ოცნება” ანტიდემოკრატიული ნაბიჯების გადადგმას გააგრძელებს, ორ სახელმწიფოს შორის ურთიერთობები შემცირდება.
სალივანის კომენტარს X-ზე ჟურნალისტი ალექს რაუფოღლუ ავრცელებს.
რაუფოღლუს ცნობით, „ამერიკის შეერთებული შტატები ამბობს, რომ მიმდინარე კვირაში „ქართული ოცნების” ოფიციალურ პირებთან ნიუ-იორკში ჩაშლილი შეხვედრები „მათ ანტიდემოკრატიულ ნაბიჯებს” უკავშირდებოდა”.
„გარკვეული პერიოდის განმავლობაში, ჩვენ შეშფოთებულები ვიყავით იმ ტრაექტორიით, რომლითაც პარტია „ქართულ ოცნებას” საქართველო მიჰყავს. ჩვენ გვჯერა, რომ ქართველების უმეტესობას სურს – ინტეგრაცია დასავლეთთან, ევროკავშირთან, პოტენციურად NATO-სთან.
ამის გამო, ჩვენ ძალიან მკაფიო ნაბიჯები გადავდგით ჩვენი ორმხრივი ურთიერთობის, ასევე, ევროპელ პარტნიორებთან კოორდინაციის თვალსაზრისით…
თუ ისინი [„ქართული ოცნება”] გააგრძელებენ ანტიდემოკრატიული ან ისეთი ნაბიჯების გადადგმას, რომლებიც ადამიანებს თავიანთი მოსაზრებების გამოხატვის და საკუთარი მომავლის განსაზღვრის უფლებას არ მისცემს, ვფიქრობ, თქვენ ნახავთ, რომ ეს აისახება და შეამცირებს ჩვენს ურთიერთობებს”, – აცხადებს სალივანი.
