საპარლამენტო ჯგუფი „გირჩი“ „ქართულ ოცნებასთან“ კოალიციას არ გამორიცხავს, – ამის შესახებ პარტიის ლიდერმა იაგო ხვიჩიამ გადაცემა „კვირის ფორმულაში“ განაცხადა.
მან ისაუბრა იმ პირობებზე/შეთავაზებებზე, რის შემდეგაც „ქართულ ოცნებასთან“ ან დანარჩენ ოპოზიციასთან კოალიციის შექმნაზე ითანამშრომლებს. ხვიჩიას თქმით, მისთვის ასეთი საკითხია ძალაუფლების ბერკეტის დათმობა და პირველ რიგში, სასამართლო სისტემის რეფორმა.
„[არის] ყოფილი ხელისუფლება და მოქმედი ხელისუფლება, ვერცერთმა ვერ აიღო 50%, შუაში მე ვარ; თუ ოპოზიცია ვერ მთავაზობს „ქოცებზე” უკეთეს პირობას, მე რატომ მევალება, რომ მეორე მხრიდან სულელებს, რომლებიც „ქოცებზე” უკეთესსაც ვერ მთავაზობენ, კოალიცია შევუკრა?! რატომ მევალება ეს?!
მე გითხარით, რომ „ნაცებმა“ უკეთესი პირობა შემომთავაზონ, მაგათთან შევალ-მეთქი. თუ უკეთესს ვერ შემომთავაზებენ, ჯვარი ხომ არ მაქვს დაწერილი „ნაცებზე”?!
…მე არ დავუშვებ შეთანხმებას ვინმესთან – ან „ქოცებთან”, ან „ნაცებთან”, თუ მეცოდინება, რომ ერთპიროვნული ძალაუფლების ხელიდან გაშვების ბერკეტები არ არის. თუ ეს არ ვიცი, ვიწვევ პოლიტიკურ კრიზისს და ვეუბნები – მე ვერ ავიღებ პასუხისმგებლობას ძალაუფლების ბერკეტის დათმობის გარეშე. ჩემთვის ეს პირველ რიგში არის სასამართლო”, – განაცხადა ხვიჩიამ.
შეკითხვის შემდეგ, რაში უნდა გამოიხატოს პირობის მიღება, რა უნდა ქნას ამისთვის „ოცნებამ”, ხვიჩიასა და გადაცემის თანაწამყვან ვახო სანაიას შორის ამგვარი კითხვა-პასუხი წარიმართა:
ხვიჩია: „პირველივე პარლამენტის სხდომაზე ვიღებთ კანონების პროექტს, რომელიც მიგვაჩნია, რომ დაშლის სისტემას… დავშლი კოალიციას თუ არ შეასრულებს [პირობას], რა პრობლემაა”.
სანაია: „შანსი, ითანამშრომლოთ რუს ბიძინასთან და შანსი – ითანამშრომლოთ ოთხ პოლიტიკურ პარტიასთან – გაათანაბრეთ და ამბობთ, რომ ბიძინასთან უფრო მეტი შანსი გაქვთ, ვიდრე ოთხთან მოლაპარაკების, სადაც უფრო მეტი შანსი გაქვთ პირობების დაყენების”.
ხვიჩია: „ბიძინას არ ვიცნობ, მასთან არასდროს არ მილაპარაკია და არ ვიცი, მასთან მოლაპარაკების რა შანსი მაქვს. არ ვიცი, დამთანხმდება თუ არა. ამ სულელებს კი ვიცნობ, ამათმა სიტყვის ფასი არ იციან… თუ იმას ამბობთ, რომ ბიძინასთან არცერთ შემთხვევაში არ უნდა შეხვიდე კოალიციაში, მაშინ ხარ „ნაცი”, მე კი „ნაცი” არ ვარ… მე ვისთანაც მომიწევს თანამშრომლობა, ვითანამშრომლებ, რადგან ეს პროფესია მაქვს”.
ხვიჩიამ ასევე განმარტა, რას გალისხმობს ტერმინ „ნაცში”:
„ჩვენ ჩვენი პოზიცია გვაქვს, რომ ამ ქვეყანაში არსებობს სამი პარტია – „ქოცები”, „ნაცები” და ჩვენ – „გირჩი”.
„ნაცი“ არის ყველა, ვინც ბიძინასთან კოალიციას გამორიცხავს – „ნაცია”, მიშაა [სააკაშვილი]. „ქოცია” ყველა, ვინც მიშასთან კოალიციას გამორიცხავს. ჩვენ ვართ „გირჩი”, ვინც არცერთთან კოალიციას არ გამორიცხავს, თუ საჯარო პირობები დაიდება და ეს იქნება დამაჯერებელი.
კაზუსი არის არასწორი, რომელსაც უნდა დააფიქსიროს – მე უფრო „ქოცი” ვარ, თუ უფრო „ნაცი“, მე კი არ მინდა ამის თქმა, რადგან ორივე ფეხებზე მკიდია”, – განმარტავს ხვიჩია.
თანაწამყვან, მიშა მშვილდაძის შეკითხვაზე – თუ „ოცნება“ და დანარჩენი ოპოზიცია ერთსა და იმავეს შესთავაზებს, ვის მიანიჭებს უპირატესობას, ხვიჩია ამბობს, რომ ამ შემთხვევაში გადამწყვეტი დამაჯერებლობა იქნება:
– ერთი უფრო მეტს შემომთავაზებს. „ტეხასმოტრის” გაუქმებასავით მაინც იქნება რაღაცა.
– მეორეც თუ წაგიმატებს?
– ვივაჭროთ, ეს არის ვაჭრობის პროცესი… რომელიც უფრო დამაჯერებლად იტყვის იმ წუთას.
– სასამართლო რეფორმაზე გთანხმდება ორივე, ვის უფორმებ კოალიციას?
– ვინც უფრო დამაჯერებლად დამთანხმდება; ვინც უფრო დამაჯერებლად მომცემს პირობას.
ამის პარალელურად გადაცემის თანაწამყვანებსა და სტუმარს შორის გაიმართა პოლემიკა – არის თუ არა რუსული რეჟიმი „ქართული ოცნება” და საგარეო პოლიტიკის კურსის ცვლილება ნიშნავს თუ არა იმას, რომ „ქართული ოცნება” არის რუსული რეჟიმი.
შეკითხვაზე, არის თუ არა „ქართული ოცნების“ მმართველობა რუსული რეჟიმი, ვინაიდან მათ შეცვალეს ქვეყნის საგარეო-პოლიტიკური კურსი, იაგო ხვიჩია პასუხობს, რომ საქართველოში რუსული რეჟიმია ბოლო 30 წელია.
მისივე თქმით, კრიტერიუმები, რითაც რუსული რეჟიმობა ფასდება, არაა კავშირში საგარეო კურსის ცვლილებაზე განცხადებებთან, არამედ, რუსული რეჟიმის მთავარი ინდიკატორი ცენტრალიზებულ მმართველობასა და ძალაუფლების ბერკეტის ერთი პირის ხელში თავმოყრაში გამოიხატება.
„რუსული რეჟიმი სხვა რამეს ნიშნავს… რუსული რეჟიმის დამამყარებელი საქართველოში იყო ყველა პირველი პირი – შევარდნაძის ჩათვლით, მიშას ჩათვლით, ამათი ჩათვლით. ზვიად გამსახურდიამ ვერ მოასწრო, თორემ სანამ იყო, რუსულ რეჟიმში იყო. იმიტომ, რომ ერთპიროვნული მმართველობა არის რუსული რეჟიმი – ცეკას მდივნის მმართველობა… რუსული ესაა ჩვენთვის“, – განაცხადა მან.
თანაწამყვანი, ნინო ჟიჟილაშვილი: „როდესაც „ქართული ოცნების“ პირობებში ჩაგვეშალა ევროკავშირში სერიოზული წინსვლა, როდესაც ჩვენი ქვეყანა საბოლოოდ დაშორდა დასავლეთს, თუკი ეს ქვეყანა რჩება ამ ხელისუფლების ხელში; თუკი ჩვენი საკონსტიტუციო ჩანაწერი დასავლურობის შესახებ დაუწერლად, მაგრამ გახდა ჩრდილოური, მართველობიან-ქცევიან-ყველაფრიანა, ნიშნავს ეს თუ არა, რომ ჩვენი ვექტორი შეიცვალა დასავლეთიდან რუსეთისკენ? და ამ თვალსაზრისით ქვეყანაში არის შესაბამისად რუსული რეჟიმი, რომელსაც აქებს რუსეთის ხელისუფლება უკვე, დაფარვის გარეშე, რომელიც არის საოცარ კონფრონტაციაში დასავლეთთან”.
ხვიჩია: „ვიზალიბერალიზაცია მიიღო ამ რეჟიმმა, კონსტიტუციაში ჩანაწერი, რომ ევროპისკენ და NATO-სკენ მივდივართ, მიიღო ამ რეჟიმმა… მაშინაც ხომ იყვნენ რუსული რეჟიმი, რამე ხომ არ შეცვლილა ამ ხალხში?! როცა ეს კონსტიტუციაში ჩაწერეს, მაშინ რუსული არ იყვნენო რომ ვთქვათ, ეს ხომ არასწორია; და დღეს გახდნენ, რადგან რამდენიმე განცხადება გააკეთა ვიღაცამ და რუსული კანონი მიიღო?!… მე კი გეუბნებით, რომ რუსული რეჟიმი ამ ქვეყანაში იყო სულ, მაგრამ ეს არ არის კავშირში პოლიტიკოსების განცხადებასთან, დასავლეთი უნდათ აწმყოში თუ აღმოსავლეთი…
ეს კავშირშია იმასთან, შენ რამდენად ვერტიკალურად გაქვს სისტემა აწყობილი, ერთი კაცი გიზის თუ არა თავში და მერე ყველა სისტემაში გიზის თუ არა კაცი, რომელიც ერთგულია ამ ერთი კაცის. ძალოვანი უწყების თავში, სუსის თავში, მინისტრები – მთლიანად, თავიდან-ბოლომდე, სასამართლო და ა.შ… თუ ყველაფერი ვერტიკალურია, თუ ადგილობრივ თვითმმართველობას არანაირი ფუნქცია არ გააჩნია, თუ სასამართლოში სტაჟიორის მოხსნა შეგიძლია თბილისიდან, ისევე როგორც პროკურატურაში, ისევე როგორც პოლიციაში, ეგაა საბჭოთა რეჟიმი, ეგრე იმართებოდა, აღმასკომისა და ცეკას მდივნებით ქვეყანა საბჭოთა კავშირის დროს”.
შეკითხვაზე, საგარეო ვექტორის ცვლილება მოხდა თუ არა მოქმედი ხელისუფლების პირობებში, ხვიჩია პასუხობს: „კი-მეთქი, გიდასტურებთ, მოხდა ცვლილება… იმიტომ ვიდავეთ, რომ თქვენ მიგაჩნიათ, რომ გასულ წელს გახდნენ ქოცები რუსები…“.
სანაია: თქვენ გაგიჭირდათ პასუხის გაცემა შეკითხვაზე, რომ „ქართული ოცნება” რუსული რეჟიმი არის იმიტომ, რომ მან საგარეო კურსი შეცვალა.
ხვიჩია: ეს არის სულელური განმარტება. ამაზე მეტად სულელური განმარტება რუსული რეჟიმის, მე არ გამიგია სამყაროში; თურმე ქვეყანაში იმიტომ არის რუსული რეჟიმი, რომ საგარეო კურსი შეიცვალა – ეს უბრალოდ არსად არ წერია. თქვენ მეუბნებით სისულელეს, როგორ შეიძლება, ეს სისულელე არ იყოს, რომ ქვეყანაში არის თურმე დამყარებული რუსული რეჟიმი, იმიტომ, რომ შეიცვალა საგარეო კურსი. ეს როგორ შეიძლება სისულელე არ იყოს, რეჟიმობასთან რა კავშირი აქვს საერთოდ საგარეო კურსის ცვლილებას. რეჟიმობასთან კავშირი აქვს იმას, თუ როგორ გაქვს შიგნით ვერტიკალი აწყობილი… მანამდე არ იყო?! ორი წლის წინ არ იყო? ეს თქვენ დაინახეთ ახლა.
სანაია: საგარეო ვექტორის ცვლილება არ ნიშნავს რუსულ რეჟიმს?
ხვიჩია: არ ნიშნავს და რა გავაკეთო. პროდასავლურიც რომ იყო, მაინც რუსული იყო ეს რეჟიმი, ორი წლის წინაც, კონსტიტუციაში რომ წერდნენ, მაშინაც რუსული იყო. თქვენ სანამ მიხვდებოდით, რომ რუსული იყო, მანამდეც რუსული იყო-მეთქი – ამას ვამბობ. ახლა მიხვდი, საგარეო კურსი რომ შეიცვალა.
იაგო ხვიჩიამ გადაცემაში ასევე ისაუბრა კონსტიტუციის ცვლილების საჭიროებაზე. უაზრობა უწოდა „პრეზიდენტის ქარტიას” და აღნიშნა, რომ:
„სინამდვილეში ჩვენ ახალი კონსტიტუციის ტექსტი გვჭირდება. კობახიძის კონსტიტუციით ვცხოვრობთ, „ქოცების” ერთპიროვნული კონსტიტუციით ვცხოვრობთ. პრეზიდენტი რაღაც ქარტიას წერს და საბოლოო ჯამში არავინ საუბრობს იმაზე, როგორი ქვეყანა გვინდა, რაც კონსტიტუციაში უნდა ეწეროს.
მე პრეზიდენტს მივმართე, როდესაც ამ ქარტიაზე საუბარი დაიწყო, რომ ეს ყოფილიყო რაღაცა პრეამბულა კონსტიტუციის პროექტისთვის, რომელზეც ოპოზიცია პრეზიდენტის მედიატორობით შეთანხმდებოდა და საზოგადოებას არჩევნებზე „ქოცური” კონსტიტუციის ნაცვლად ახალ მოწყობას შესთავაზებდა, რომელიც კონსტიტუციით იქნებოდა დამტკიცებული…
მე ამ შემთხვევაში არ ვეხებოდი კონსტიტუციურ წყობას, მე ვეხებოდი ძალაუფლების კონცენტრაციის წყაროებს, რომ რაღაცნაირად ეს ყოფილიყო დეცენტრალიზებული, ამაზე უნდა გვემსჯელა, როგორი საქართველო იქნებოდა ბიძინა ივანიშვილის შემდეგ. ამის ნაცვლად კი, რაღაც უაზრო ქარტიაზე იმსჯელეს ამდენი, ხელი მოაწერეს და დღემდე არავის ესმის რას ნიშნავს მისი თითოეული პუნქტი და როგორ უნდა შესრულდეს ის”, – განაცხადა ხვიჩიამ.
