აქციების დროს ნარკოდანაშაულის ბრალდებით დაკავებული ანასტასია ზინოვკინა რუსთავის ქალთა პენიტენციური დაწესებულებიდან წერილს აქვეყნებს:
„ახლა ამ წერილს იმ იმედით ვწერ, რომ ციხიდან გამომიშვებენ. მაგრამ მეშინია, უფრო სწორად, ვნერვიულობ, რომ გარკვეული ხნით მაინც მომიწევს მოწამედ ყოფნა. ამიტომ, იმ შემთხვევაში, თუ ციხიდან შემდეგ წერილსაც გამოვგზავნი, ძალიან მჭირდება დახმარება ინფორმაციის მოძიებასა და ყველანაირი განცხადების დაწერაში.
აქაური პირობები ამაზრზენია, გოგონები, რომლებსაც არავინ ეხმარება, ცხოველებივით ცხოვრობენ. საპნის ერთი ნაჭერი გამოიყენება თმის, სხეულის დასაბანად და წინდების, ტრუსებისა და ჭურჭლის გასარეცხად. თუ საპონი უფრო სწრაფად ამოიწურება, ვიდრე ბადრაგი ახლის მოცემას ინებებს (3 თვეში ერთხელ), მაშინ ისინი, უბრალოდ, არ ბანაობენ. საშინელი ანტისანიტარია. თვეში ერთი რულონი ტუალეტის ქაღალდი…
და მაშინაც კი, მხოლოდ იმ შემთხვევაში გაძლევენ, თუ ბარათზე საერთოდ არ გაქვს ფული. თუ 10 ლარი მაინც გაქვს, გეუბნებიან: „იყიდე“. ყველანაირი დაავადება სოკოებიდან დაწყებული, ტკიპებითა და ტილებით დამთავრებული. ჩაიდანში (ელექტრომადუღარა) ვადუღებ წყალს, პლასტმასის ჩაიდანში, 200 მლ-ში ვრეცხავ ყველა ტანსაცმელს და ვიბან თავს. წინააღმდეგ შემთხვევაში – ახალი დაავადებები და პრობლემები.
ვიცი, რომ მწეველის სიგარეტის გარეშე დატოვება სასტიკი და არაადამიანურია, მაგრამ ტუალეტის ქაღალდის გარეშე? საპნის გარეშე? შამპუნის გარეშე? (მას საერთოდ არ აძლევენ). შხაპის მიღება კვირაში მხოლოდ ორჯერ, ოთხშაბათსა და კვირას, 15 წუთით არის შესაძლებელი.
საკანში ცხელი წყალი არ არის. ზამთარშიც არაა. გოგონები, რომლებსაც ჩუსტები არ აქვთ, იქ ფეხშიშველნი ან საერთო ჩუსტებით ბანაობენ. ისინი ავადდებიან სოკოთი და ერთმანეთს აინფიცირებენ. სარეცხი ფხვნილი თვეში ერთხელ გაიცემა. მე ყურადღებით ვაკვირდები ხოლმე გაცემის მომენტს. საკანში საჭმლის მომზადება არ შეგიძლია.
რატომ? იმიტომ, რომ არ შეიძლება და მორჩა. შეგიძლიათ, მაღაზიაში შეიძინოთ კვერცხი, თუ მას შეჭამთ (მხოლოდ 10 ცალს ყიდიან) ან შვრიის ფაფა და მდუღარე წყალი უნდა დაასხათ. სულ ესაა. ეს არის საჭმლის მომზადების მაქსიმალური რაოდენობა. ყველას არ შეუძლია რადიოს ან ტელევიზორის შეძენა. ზოგი სრულიად მოწყვეტილია გარესამყაროს (შეგახსენებთ, რომ ზარები და წერილები ფული ღირს). 1 წერილი 4,5-10 ლარი, სხვა ქვეყანაში დარეკვა ძვირია. კალმები და რვეულებიც კი ფუფუნებაა.
გვერდით მალაიზიელი მეზობელი ზის. მას სინგაპურში ჰყავს ნათესავები. ჩინურად საუბრობს, ანუ საერთოდ ვერ ლაპარაკობს. ფული არ აქვს. არ ჭამს. არ რეკავს. ზის და იტანჯება. რა თქმა უნდა, არსებობს სხვა საკანიც. ახლა კარგი საკანი მაქვს. ჩვენ ყოველთვის ვკვებავთ მას და ასე შემდეგ. ფსიქოლოგს სუდოკუს თავსატეხი ვთხოვე და ახლა ისიც კმაყოფილია, რომ აქვს. ჩინურ ენაზე წიგნები არ არსებობს. რიგრიგობით ამოვხსნით. რიგრიგობით მოვაგვარებთ. ჩემი გული რევოლუციასთანაა!
ჩემი გული მათთანაა, ვინც რუსთაველზეა. გამარჯვება. იმედი მაქვს, ანტონ ჩეჩინი გადარჩება. მისი გადარჩენა აუცილებელია. მას ჯანმრთელობის პრობლემები აქვს, ტვინის სიმსივნე აქვს და ეს განაჩენი მკვლელობაა.
მე კი გადავრჩები რამენაირად, ასე ადვილად სიკვდილს არ ვაპირებ და გთხოვთ, არტემ გრიბული გადაარჩინეთ. მადლობა წერილებისთვის! მადლობა მხარდაჭერისთვის. ძალიან ვნერვიულობ თითოეულ პატიმარზე. ნიკა კაციასთან, გიორგი ახობაძესთან და თედო აბრამოვთან ერთად გამათავისუფლეს. ოო, ეს შესანიშნავი იყო! ვეხუტები მათ“ – წერს ანასტასია ზინოვკინა წერილში.
12 სექტემბერს აქციების დროს ნარკოდანაშაულის ბრალდებით დაკავებულ ანასტასია ზინოვკინასა და არტემ გრიბულს 8.5 – 8.5 წელი მიესაჯათ, – განაჩენი მოსამართლე ნინო გალუსტაშვილმა გამოაცხადა.
ანასტასია ზინოვკინა და არტემ გრიბული 17 დეკემბერს დააკავეს, მათ ბრალი განსაკუთრებით დიდი ოდენობით ნარკოტიკული საშუალების ფლობაში ედებათ.
ისინი ბრალს არ აღიარებენ და ამბობენ, რომ მათ ნარკოტიკი ჩაუდეს აქციებში მონაწილეობის გამო. დაცვის მხარის თქმით, ჩადება მოხდა როგორც პირადი ჩხრეკისას, ასევე ბინაშიც.
ისევე როგორც აქციების დროს ამავე მუხლით დაკავებული პირების საქმეებში, ამ შემთხვევაშიც, პირადი ჩხრეკა – დაკავების საგამოძიებო მოქმედება გადაღებული არაა.
ამასთან, დაცვის მხარეს არ მიეცა შესაძლებლობა, გამოეთხოვა დაკავების ადგილზე არსებული სუპერმარკეტის ვიდეოსამეთვალყურეო კამერის ჩანაწერები. ადვოკატების თქმით, პოლიციელთა დაშინების შედეგად ჩვენების მიცემაზე უარი განაცხადა ტაქსის მძღოლმა, მათი თქმით, ადგილიდან ასევე გააგდეს პირები, რომელიც ფაქტს შეესწრნენ.
რაც შეეხება სახლის ჩხრეკის ვიდეოს, დაცვის მხარის თქმით, ის ზედაპირულია და არ არის გამორიცხული ეჭვი ბინაში ნარკოტიკული საშუალების ჩადებაზე. მათი თქმით, ბინის მეპატრონე სრულყოფილად ვერ ადევნებდა თვალს ჩხრეკის მიმდინარეობას, ამასთან ადვოკატების თქმით, ბინის ჩხრეკის დროს ადგილზე იმყოფებოდა პირი, რომელიც ოქმში ოფიციალურად არაა ასახული.
აღნიშნული გარემოებების საფუძველზე აცხადებენ ისინი, რომ ბინიდან ამოღებული ნარკოტიკული საშუალებაც ჩადებულია.
