„ქართული ოცნების“ მთავრობის განკარგულებით, უკრაინაში ომის გამო საქართველოში მცხოვრები უკრაინის მოქალაქეების ოჯახებზე 300-ლარიანი, ხოლო პირზე 45-ლარიანი დახმარების გაცემა 2026 წლის 1 აპრილამდე გახანგრძლივდა.
ირაკლი კობახიძის ხელმოწერილი განკარგულების მიხედვით, დაფინანსებას სოციალური მომსახურების სააგენტო დევნილთა სააგენტოს მიერ მიწოდებული სიის საფუძველზე გასცემს.
ასევე 1 აპრილამდე გახანგრძლივდა უკრაინის მოქალაქეების სამედიცინო სერვისებით სარგებლობა.
განკარგულების მიხედვით, ჯანდაცვის პროგრამის ფარგლებში გათვალისწინებულია შემდეგი სერვისები:
იმუნიზაცია, ტუბერკულოზისა და აივ-ინფექციის, შიდსის მკურნალობა, მათ შორის, სპეციფიკური მედიკამენტებით უზრუნველყოფა;
დედათა და ბავშვთა ჯანმრთელობა, მათ შორის, ანტენატალური მეთვალყურეობა და ახალშობილთა სკრინინგი; ფსიქიკური ჯანმრთელობა;
დიაბეტის მართვა, მათ შორის, მედიკამენტებით უზრუნველყოფა;
დიალიზი;
იშვიათი დაავადებების მქონე და მუდმივ ჩანაცვლებით მკურნალობას დაქვემდებარებულ პაციენტთა მკურნალობა;
რეფერალური მომსახურება − გადაუდებელი საჭიროების სამედიცინო სერვისები, მათ შორის, მშობიარობა, გადაუდებელი იმუნიზაცია.
