იუსტიციის სამინისტროს ინფორმაციით, სანოტარო ბიუროების გახსნა და მათი ჩვეულ სამუშაო რეჟიმში ეტაპობრივად დაბრუნება თბილისიდან დაიწყო.
სამინისტროს ინფორმაციით, დღეს, 20 მაისს, პირველი ასეთი ბიურო დავით გამრეკელის ქ. №6-ში უკვე გაიხსნა. რაც შეეხება დროებით სანოტარო ბიუროებს, ისინი mygov.ge-ის მოქალაქის პორტალზე ვიზიტის წინასწარი დაჯავშნის პრინციპით მუშაობას იმ დრომდე გააგრძელებენ, სანამ სანოტარო ბიუროების მუშაობა სრულად არ აღდგება.
სამინისტროში ამბობენ, რომ სანოტარო ბიუროებმა მუშაობის გასაახლებლად ნებართვა იუსტიციის სამინისტროსაგან უნდა მიიღონ. საამისოდ კი აუცილებელია, სამუშაო სივრცე იძლეოდეს საშუალებას, სრულად იქნეს დაცული ჯანდაცვის მსოფლიო ორგანიზაციის, კორონავირუსთან დაკავშირებით უწყებათაშორისი საკოორდინაციო საბჭოსა და საქართველოს ჯანდაცვის სამინისტროს რეკომენდაციები, რათა საფრთხე არ შეექმნას სერვისის მისაღებად მისული მოქალაქეებისა და ნოტარიუსების ჯანმრთელობას.
იმისათვის, რომ სანოტარო ბიურომ ჩვეულ რეჟიმში მუშაობის უფლება მოიპოვოს, ნოტარიუსმა სამინისტროს უნდა წარუდგინოს შესაბამისი დოკუმენტაცია იმის შესახებ, რომ მათი ბიურო აკმაყოფილებს შემდეგ მოთხოვნებს:
Ø ბიუროს საერთო ფართობი არის არანაკლებ 30 კვ. მეტრისა;
Ø სანოტარო ბიურო ან მისი ნაწილი არ მდებარეობს შენობის ნულოვანი ნიშნულის ქვევით;
Ø ნოტარიუსის სამუშაო ოთახი გამოყოფილია სხვა ოთახებისაგან და აქვს ფანჯარა;
Ø მოქალაქეთა მისაღები ან მოქალაქეთა მოსაცდელი სივრცის ფართობი არის არანაკლებ 15 კვ. მეტრისა და აქვს ფანჯარა, ხოლო თუ მოქალაქეთა მისაღები ან მოქალაქეთა მოსაცდელი სივრცე, ამავე დროს, ნოტარიუსის თანაშემწის სამუშაო ოთახია, მისი ფართობი არის არანაკლებ 20კვ. მეტრისა;
Ø მოქალაქის მოსაცდელად განკუთვნილი ოთახის მოპირდაპირე კედლებს შორის მანძილი არის არანაკლებ 3 მეტრისა;
Ø იმ სანოტარო ბიუროებში, სადაც თარჯიმანიც მუშაობს, მისთვის ცალკე ოთახია გამოყოფილი, სანოტარო ბიუროს საერთო ფართი კი არ არის 40 კვ. მეტრზე ნაკლები.
Ø იმ შემთხვევაში კი, თუკი ბიუროში ერთდროულად ნოტარიუსის ორზე მეტი თანამშრომელია (თანაშემწე, თარჯიმანი ან სხვა), სანოტარო ბიუროს საერთო ფართობი არის არანაკლებ 50 კვ. მეტრისა.
შესაბამისი დოკუმენტაციის (ამონაწერი საჯარო რეესტრიდან, აზომვითი ნახაზი) სრულყოფილად წარდგენის შემდეგ, საქართველოს იუსტიციის სამინისტრო გასცემს ნებართვას ნოტარიუსზე სანოტარო ბიუროს გახსნის შესახებ.
„ნებართვის გაცემის საკითხის განხილვისას, იუსტიციის სამინისტრო ასევე იღებს მხედველობაში საქართველოში არსებული ყველა სანოტარო ბიუროს ინსპექტირების შედეგებს, რომლებიც მიმდინარე წლის აპრილ-მაისში ჩატარდა. ინსპექტირების ფარგლებში, იუსტიციის სამინისტროს გენერალური ინსპექციის მიერ ვიზიტი განხორციელდა 239 სანოტარო ბიუროში, მოხდა ოთახების აღწერა და დასურათება, “- ამბობენ სამონისტროში.
