ადვოკატი მარიამ პატარიძე „პუბლიკასთან” ამბობს, რომ მოქალაქე ლუკა კინწურაშვილი დაკავების შემდეგ ორჯერ – პოლიციის განყოფილებასა და წინასწარი დაკავების იზოლატორში სრულად გააშიშვლეს და სიტყვიერი შეურაცხყოფა მიაყენეს.
ამათთან, მას ლუკას მარცხენა მხარი და მუხლი აქვს დაზიანებული.
ადვოკატის თქმით, გაშიშვლება საგანგაშო პრაქტიკაა.
„სახელმწიფო არ ჯერდება საპოლიციო თვითნებობას და კიდევ უფრო დიდ მასშტაბებს სძენს უკანონობას, როცა დამამცირებელ სიტუაციაში აყენებს დაკავებულებს. სახელმწიფო ამ მეთოდს იყენებს არა მხოლოდ გამოხატვის თავისუფლებისთვის დაკავებული აქტივისტების, არამედ ყველას მიმართ, ვინც თვალში არ მოუვა შინაგან საქმეთა სამინისტროს“, – ამბობს მარიამ პატარიძე.
მისი თქმით, „გაშიშვლების შემდეგ ერთ-ერთმა ლუკა კინწურაშვილს მას ყურადღება გაუმახვილა მკერდის პირსინგებზე და უთხრა, რომ ეს საზიზღრობაა, განსაკუთრებით, როცა პირსინგები მკერდზე კაცს აქვს გაკეთებული“.
პატარიძე ასევე ამბობს, რომ ლუკა კინწურაშვილს უმიზეზოდ აჩერებენ და აკავებენ მისი გარეგნობის გამო – აქტივისტს ტატუები და პირსინგები აქვს.
ლუკა კინწურაშვილი პოლიციამ გუშინ, 31 მარტს, 20:00 საათზე, ვაჟა ფშაველას გამზირზე „ზედაპირული დათვალიერების“ მოტივით ქუჩაში გააჩერა, რის შემდეგაც, ის გაჩხრიკეს, მოსთხოვეს „ტელეგრმის“ ჩათზე წვდომა, შემდეგ კი წაართვეს ტელეფონი.
„ჯერ მოსთხოვეს ჩანთის გახსნა, რის უფლებაც მათ არ ჰქონდათ, მაგრამ ლუკა დაემორჩილა და აჩვენა, რომ არაფერი ჰქონდა. გაუჩხრიკეს ჯიბეები. შემდეგ უთხრეს, რომ მიმდებარე ტერიტორიაზე რაღაც დანაშაული მოხდა და პრევენციის მიზნით აინტერესებდათ, ხომ არ ჰქონდა მიმოწერა ბოტებთან. ლუკამ უთხრა, რომ მას ამგვარი კომუნიკაცია არასდროს არ ჰქონია, ადვოკატთან კონსულტაციის შემდეგ კი მიიღებდა გადაწყვეტილებას ტელეგრამის გახსნაზე, იმიტომ, რომ იქ აქვს პირადი ცხოვრების ამსახველი მნიშვნელოვანი ინფორმაცია“, – ამბობს მარიამ პატარიძე.
ადვოკატის თქმით, სწორედ მან უთხრა ლუკას, ჩაერთო ლაივი, სანამ ის ადგილზე მისვლას შეძლებდა და სწორედ ეს გახდა ტელეფონის წართმევის საფუძველი.
მას შემდეგ მარიამ პატარიძემ და ორგანიზაცია „სოციალური სამართლიანობის ცენტრმა” ლუკა კინწურაშვილთან დაკავშირება რამდენიმე საათის განმავლობაში ვერ შეძლო.
პატარიძე ამბობს, რომ დაკავებულის მოძებნაში დახმარება სახალხო დამცველის აპარატსაც სთხოვა, თუმცა, მათგან პასუხი ამ დრომდე არ მიუღია.
ადვოკატისვე განცხადებით, როგორც დღეს ლუკამ უთხრა, პოლიციელები მას ეუბნებოდნენ, რომ თუ ადვოკატზე უარს იტყოდა, 24 საათში გაათავისუფლებდნენ.
„თუმცა, მე შევედი თუ არა დაკავების იზოლატორში, თანამშრომლებმა მითხრეს, რომ მას უკვე გახანგრძლივებული აქვს დაკავების ვადა კიდევ 24 საათით“, – ამბობს პატარიძე.
ლუკა კინწურაშვილი ადმინისტრაციულ სამართალდარღვევათა კოდექსის 173-ე – პოლიციელის დაუმორჩილებლობის მუხლი არის დაკავებული.
„პუბლიკა“ შინაგან საქმეთა სამინისტროსაც დაუკავშირდა. უწყებისგან პასუხი ჯერჯერობით არ მიგვიღია.
ლუკა კინწურაშვილი პოლიციელებმა „დათვალიერების“ მოტივით ქუჩაში 2024 წლის ივლისშიც გააჩერეს, შემდეგ კი დააკავეს და ადვოკატთან დაკავშირების საშუალება არ მისცეს. დაკავების დეტალებზე საუბრის დროს კინწურაშვილი იხსენებდა, რომ პოლიციამ მას შეურაცხყოფა მიაყენა. ლუკა კინწურაშვილი მოსამართლემ სამართალდამრღვევად ცნო და სიტყვიერი შენიშვნა მისცა.
