ორგანიზაცია „საფარის“ ინფორმაციით, ადვოკატი სექსუალურად ავიწროებდა ქალს, რომელსაც სამართლებრივ კონსულტაციას უწევდა.
როგორც ორგანიზაციის მიერ გავრცელებულ განცხადებაშია აღნიშნულია, ნინო გოდერძიშვილმა, თავისი მოქმედი ადვოკატის ლ. ჯ-ის მიერ მის მიმართ ჩადენილი ფსიქოლოგიური ძალადობის, სექსუალური შევიწროების, ადევნების ფაქტებთან დაკავშირებით, დახმარებისათვის საფარს 2020 წლის სექტემბრის დასაწყისში მიმართა.
„ნინოს სოციალური ქსელის Facebook-ის მეშვეობით დაუკავშირდა ადვოკატი ლ. ჯ., რომელიც სამართლებრივი კონსულტაციისას კლიენტის სექსუალურ შევიწროებას შეუდგა. მიმოწერის დროს, იგი ნინოს დროდადრო უგზავნიდა თავის პირად ფოტოებს/ვიდეოებს, და სხვადასხვა ხერხებით ცდილობდა, იგი ურთიერთობაზე დაეთანხმებინა.
როდესაც მსხვერპლმა ამ შეთავაზებებზე მტკიცე პროტესტი გამოხატა, ადვოკატმა ლ. ჯ-მა სიტყვიერი შეურაცხყოფა მიაყენა მას, უწოდა „უტვინო“, „გოიმი“, „სოფლელი“, „განათხოვარი“, მოკლედ, მის ყოველმხრივ დისკრედიტაციას შეეცადა.
უამრავი შეურაცხმყოფელი გამოხდომის შედეგად, ნინომ ადვოკატს მასთან კონტაქტის ყველანაირი საშუალება დაუბლოკა. ამის შემდეგ, მოძალადეს კვლავ ჰქონდა მასთან დაკავშირების მცდელობები 3 სხვადასხვა ფეისბუქ პროფილიდან, რომლებიც ნინომ ასევე დაბლოკა.
გარდა ამისა, ადვოკატი თვალს ადევნებდა ნინოს აქტივობას ფეისბუქზე, „დიღმის მასივის“ ჯგუფში, სადაც ასევე თვითონაცაა გაწევრიანებული და ამ ჯგუფში მსხვერპლის კომენტარის გამოყენებით, შეძლო საცხოვრებელი მისამართის გაგება და ამ მისამართზე მისვლა, რაც ნინოსთვის უკიდურესად არასასურველი და გამაღიზიანებელი იყო“, – წერია ორგანიზაციის განცხადებაში.
ორგანიზაციამ, სექსუალური შევიწროების დადგენის მიზნით, სახალხო დამცველსა და ადვოკატთა ასოციაციის ეთიკის კომისიას მიმართა.
„ადვოკატმა ლ. ჯ-მა დაურეკა ნინო გოდერძიშვილს და დაჟინებით მოსთხოვა შეხვედრა, რაზე უარის მიღების შემდეგ, თავის პირად ფეისბუქ გვერდებზე და ასევე სხვადასხვა საჯარო ჯგუფებში გამოაქვეყნა შეურაცხმყოფელი საჯარო პოსტები, რომელსაც დაურთო ნინოს ფეისბუქიდან უნებართვოდ აღებული, მოპარული პირადი ფოტო.
ამ პოსტებზე, უამრავი ადამიანი საჯარო კომენტარებით შეურაცხყოფას აყენებს ნინოს. კომენტარებში განსაკუთრებული აგრესიით გამოირჩევა თავად ადვოკატი ლ. ჯ., რომელიც მსხვერპლს მტრულ, შეურაცხმყოფელ, ღირსების შემლახავ გარემოს უქმნის“, – წერია გავრცელებულ განცხადებაში.
2020 წლის 30 ნოემბერს, „საფარმა“ საგამოძიებო ორგანოს მიმართა. 2020 წლის 2 დეკემბერს, ადვოკატის მიმართ შემაკავებელი ორდერი გამოიცა, რაც ლ.ჯ.-მ გაასაჩივრა.
2020 წლის 30 დეკემბერს, თბილისის საქალაქო სასამართლოს ადმინისტრაციულ საქმეთა კოლეგიის მოსამართლემ თამარ მეშველიანმა გამოიტანა გადაწყვეტილება, რომლის თანახმად, არ დაკმაყოფილდა მოძალადე ლ. ჯ-ის სარჩელი და ძალაში დარჩა ნინო გოდერძიშვილის დაცვის უზრუნველსაყოფად გამოცემული შემაკავებელი ორდერი.
