ადვოკატ მარიამ პატარიძის ცნობით, გუშინ აქტივისტი, ლუკა კინწურაშვილი დააკავეს. მისი ცნობით, კინწურაშვილი ადმინისტრაციული წესით არის დაკავებული – ადვოკატი ჰყვება, რომ აქტივისტი პოლიციამ „ზედაპირული დათვალიერების“ მოტივით ქუჩაში გააჩერა, რის შემდეგაც, ის გაჩხრიკეს და წაართვეს ტელეფონი.
„ლუკა შეაჩერეს საპოლიციო ღონისძიების ფარგლებში და როგორც ხდება ხოლმე, ზედაპირული დათვალიერება გადაიზარდა ჩხრეკაში და ამის გამო, ლუკამ დამირეკა. ვუთხარი, რომ იმ შემთხვევაში, თუ საპოლიციო ღონისძიებები ტარდებოდა, ამ შემთხვევაში – ჩხრეკა, მე მივიდოდი ადგილზე და ჩემი მონაწილეობით ჩაეტარებინათ ეს ღონისძიება, მაგრამ, როგორც აღმოჩნდა და ლუკამ როგორც დამიდასტურა სატელეფონო საუბრისას, ჩანთა უკვე გახსნილი იყო და მას სთხოვდნენ ენახებინა „ტელეგრამის“ ჩატში არსებული მიმოწერა.
ასევე, ლუკას ვუთხარი, თუ სამართალდამცველები არ დათანხმდებოდნენ ჩემი მონაწილეობით საპოლიციო ღონისძიების გაგრძელებაზე, მას შესაძლებლობა ექნებოდა, გასულიყო პირდაპირ ეთერში. სწორედ ამ დროს წაგლიჯეს ტელეფონი ლუკას და ამის შემდეგ, 6 საათის მანძილზე ჩვენ ვერ ვადგენდით მის ადგილსამყოფელს და შემთხვევით აღმოვაჩინეთ, რომ ლუკა დაკავებულია ადმინისტრაციული წესით… მას აქვს ბევრი ტატუ, რაც არის ხოლმე ნიშანი იმის, რის საფუძველზე ხდება სამართალდამცავების სამიზნე“, – მარიამ პატარაძე, ლუკა კინწურაშვილის ადვოკატი.
„პუბლიკა“ დამატებითი დეტალების გარკვევის მიზნით შინაგან საქმეთა სამინისტროს დაუკავშირდა.
ლუკა კინწურაშვილი პოლიციელებმა იმავე მოტივით ქუჩაში გასული წლის ივლისშიც გააჩერეს, შემდეგ კი დააკავეს და ადვოკატთან დაკავშირების საშუალება არ მისცეს. დაკავების დეტალებზე საუბრის დროს კინწურაშვილი იხსენებდა, რომ პოლიციამ მას შეურაცხყოფა მიაყენა. ლუკა კინწურაშვილი მოსამართლემ სამართალდამრღვევად ცნო და სიტყვიერი შენიშვნა მისცა.
