ამერიკაში მოღვაწე ქართველი ექიმი, პროფესორი ზურაბ გურული აცხადებს, რომ ანაფილაქსური შოკი არის აბსოლუტურად ყველა სახის ვაქცინის შესაძლო, იშვიათი გვერდითი ეფექტი და მისი განვითარება არ ნიშნავს ვაქცინის უხარისხობას. ის ვრცელ პოსტს აქვეყნებს ანაფილაქსური რეაქციის შესახებ, რომელსაც უცვლელად გთავაზობთ:
-
„ანაფილაქსური შოკი არის აბსოლუტურად ყველა სახის ვაქცინის შესაძლო, იშვიათი გვერდითი ეფექტი და მისი განვითარება არ ნიშნავს ვაქცინის უხარისხობას.
-
ანაფილაქსური შოკის სტანდარტული მკურნალობის მთავარ კომპონენტს წარმოადგენს ადრენალინი.
-
არსებობს ასევე იშვიათი შემთხვევები, როდესაც ანაფილაქსური რეაქცია არ ემორჩილება ადრენალინით მკურნალობას. მაშინ მართვითი სუნთქვა და სხვა მედიკამენტებია საჭირო, მათ შორის სტეროიდები.
-
გართულებული და ადრენალინის მიმართ რეზისტენტული ანაფილაქსური რეაქცია რთული სამართავია, მაგრამ აბსოლუტურად უმეტეს შემთხვევაში დადებითად სრულდება და არ ახლავს ფატალური შედეგი.
-
დარწმუნებული ვარ, რომ ქართველ რეანიმატოლოგთა გამოცდილი გუნდი წარმატებით გაუმკლავდება ამ გამოწვევას.
-
წარმოუდგენელი უზნეობაა ( სამედიცინო საზოგადოების წარმომადგენლებისაგან კი არაპროფესიონალიზმი ) ამ სამწუხარო შემთხვევის შესახებ ნიშნის მოგებით საუბარი, რადგან ასეთი იშვიათი გვერდითი ეფექტის თავიდან აცილება პრაქტიკულად შეუძლებელია მასიური ვაქცინაციების დროს.
-
სრული მხარდაჭერა და საუკეთესო სურვილები პაციენტსა და მის ოჯახს“, – აღნიშნავს გურული.
„ყველაზე სერიოზული, რომელიც ვითარდება სწრაფად, ეს გახლავთ ანფილაქსიური რეაქცია. ის ვითარდება ინექციიდან 15-30 წუთში. ზოგადად მიღებულია, რომ საშუალოდ იმ ვაქცინაზე, რომელსაც კაცობრიობა იყენებს ბავშვებზე, ესეთი შოკი ხდება მილიონში ერთი. ეს რეაქცია შეიძლება წავიდეს მსუბუქად, მძიმედ და შეიძლება დასრულდეს ფატალურადაც“, – განაცხადა ამირან გამყრელიძემ მას შემდეგ, რაც საქართველოში ვაქცინაციასთან დაკავშირებით პირველი სერიოზული გართულების შესახებ ინფორმაცია გავრცელდა.
