საქართველოს ყოფილი პრეზიდენტი მიხეილ სააკაშვილი, რომელიც სასჯელს იხდის და „ვივამედში“ მკურნალობს, სოციალურ ქსელში წერს, რომ მან თავი გასწირა ქვეყნის გადასარჩენად და დარწმუნებულია, რომ ქართველი ხალხი მას გაათავისუფლებს.
სააკაშვილმა თავი კიდევ ერთხელ მოიხსენია პოლიტპატიმრად და მოუწოდა პოლიტიკოსებს, რომელთაც, მისი თქმით, მისთვის სიტყვა „თავისუფლება“ არ ემეტება, მეტად გამბედავები იყვნენ.
„იმ ხალხის გასაგონად ვისაც ჩემთვის სიტყვა „თავისუფლება” არ ემეტება და მხოლოდ „ადეკვატური მკურნალობით” იფარგლება.
მეგობრებო, მე აქ სამკურნალოდ არ ჩამოვსულვარ. თავი გავწირე ქვეყნის გადასარჩენად. თქვენც ხომ კარგად იცით, რომ სრულიად ყალბი ბრალდებებით ვარ „გასამართლებული” და თავიდან ბოლომდე პოლიტიკური პატიმარი ვარ.
მე დარწმუნებული ვარ, რომ ქართველი ხალხი მაინც გამათავისუფლებს და თქვენგანაც ველი მეტ გამბედაობას. ბოლოსდაბოლოს ევროპარლამენტი, პოლონეთის და ლიტვის სეიმები, საფრანგეთის და უკრაინის პრეზიდენტები ითხოვენ ჩემს გათავისუფლებას.
მე ერთი წუთით არ ვეგუები ამ უსამართლო, პუტინის პირად პატიმრობას! ვაპირებ ბოლომდე ბრძოლას თავისუფლებისთვის და თქვენი იმედი მაქვს ასევე“, – წერს სააკაშვილი.
