31 მარტს, საპროტესტო აქციის შემდეგ ორი მოქალაქე პოლიციამ „იდენტიფიცირების მიზნით” განყოფილებაში გადაიყვანა.
გიორგი წოწკოლაური და სანდრო ლიპარტელიანი რამდენიმე საათში გაათავისუფლეს.
თუმცა, მანამდე ისინი პოლიციამ კოსტავას ქუჩაზე გააჩერა.
ორივე მათგანი ფსიქოთერაპევტია.
ლაივ-ვიდეოში გიორგი წოწკოლაური ამბობს: „გადავყავართ პოლიციის მთავარ სამმართველოში, თუმცა, არ გვეუბნებიან, რისთვის“.
„იდენტიფიცირების მოხდენის მიზნით” – ეუბნება მას პოლიციელი.
„იდენტიფიცირება მოხდა, ჩვენი პირადობები მოგეცით, ფოტოები გადაგვიღეთ, რა იდენტიფიცირებაზეა საუბარი”, – ამბობს წოწკოლაური
„დიდხანს ვერ დაგელოდებით“, – პასუხობს პოლიციელი.
სანდრო ლიპარტელიანი „ტვ პირველთან” ამბობს, რომ პოლიციელები მათ გაჰყვნენ.
„წარმოვადგინეთ პირადობები, გამოგვართვეს ეს მოწმობები, ფოტოებიც გადაგვიღეს, დაგვემშვიდობნენ. ჩვენ „სპარში” შევედით რაღაც პროდუქტის შესაძენად. მალევე გამოვედით, პოლიციელები ისევ იქ იდგნენ. გვითხრეს, რომ პროგრამამ ვერ აღიქვა, რომ ჩვენ ვიყავით ფსიქოთერაპევტები და საჭირო იყო ჩვენი გადაყვანა. გიორგიმ მოახერხა ლაივში ჩავრთულიყავით, მაგრამ ამაშიც ხელს გვიშლიდნენ. ტელეფონი წამართვეს და მანქანაშიც არ მოგვცეს დარეკვის საშუალება“, – თქვა სანდრო ლიპარტელიანმა.
წოწკოლაური და ლიპარტელიანი აქტიურად მონაწილეობენ მიმდინარე საპროტესტო აქციებში.
„ტვ პირველთან“ სანდრო ამბობს, რომ პოლიციელები მას ეკითხებოდნენ, უხდიან თუ არა ფულს აქციებზე სიარულისთვის.
