შინაგან საქმეთა ყოფილი მინისტრი და ყოფილი პრემიერ-მინისტრი, ვანო მერაბიშვილი სოციალურ ქსელში წერს, რომ ის არ მიიღებს მონაწილეობას საპარლამენტო არჩევნებში და არც ახალ მთავრობაში დაიკავებს რომელიმე თანამდებობას. მისი თქმით, „ნაციონალური მოძრაობა” ის ძალაა, რომელსაც არჩევნებში გამარჯვება შეუძლია, ოპოზიციიდან კი ხშირად ისმის „ვაჭრობა მანდატებისთვის”.
„ახლოვდება ჩვენი ქვეყნისთვის უმნიშვნელოვანესი არჩევნები. ამ არჩევნებში გადამწყვეტი იქნება არა ის, რას იზამს „ქართული ოცნება“ – რადგანაც ის უკვე გუშინდელი დღეა, გადამწყვეტი იქნება ის, თუ რამდენად შევძლებთ ჩვენ, საერთო ეროვნული მიზანი დავაყენოთ საკუთარ კარიერაზე, პირად ამბიციებზე მაღლა, ვიბრძოლოთ არა საკუთარი თავისთვის, არამედ ქვეყნის მომავლისთვის.
დღეს, სამწუხაროდ, ოპოზიციიდან უფრო ხშირად ისმის პოლიტიკური ვაჭრობა, მანდატებისა და სკამების გადანაწილებაზე საუბარი, ვიდრე საზოგადოებისთვის ალტერნატივის შეთავაზება.
განახლებული „ნაციონალური მოძრაობა“ არის ერთადერთი ძალა, რომელსაც შესწევს უნარი, გადამწყვეტი როლი შეასრულოს ამ ბრძოლაში, დაასრულოს არჩევნები გამარჯვებით და ხალხს დაუბრუნოს მომავალი.
ეს ჩემი მიმართვა რომ არ დარჩეს მხოლოდ ზოგად მოწოდებად, გადავწყვიტე, გაცნობოთ, რომ არ ვიქნები პარლამენტის წევრი და ასევე, არ დავიკავებ რომელიმე თანამდებობას მომავალ მთავრობაში. მე ვიქნები ჩართული ივანიშვილის რეჟიმის წინააღმდეგ ბრძოლაში, ოღონდ ეს იქნება ბრძოლა არა პირადი სარგებლისთვის, არამედ ბრძოლა ჩემი ხალხის მომავლისთვის”, – წერს მერაბიშვილი ფეისბუქზე.
„პუბლიკის” ინფორმაციით, ვანო მერაბიშვილი სამცხე-ჯავახეთის ერთ-ერთ ოლქში ენმ-ის მაჟორიტარი დეპუტატობის კანდიდატი უნდა ყოფილიყო.
