გამოცემა „ნეტგაზეთი“ ავრცელებს არასრულწლოვანის ცემაში ბრალდებული ხატია ვიბლიანის შესახებ დაზარალებულის ოჯახის განცხადებას.
განცხადების მიხედვით, ოჯახი მოითხოვს, პატიმრობა შეეფარდოს ხატია ვიბლიანს.
„როგორც იცით, ქ. ხატია ვიბლიანს ბრალდება წარედგინა, ოჯახი ითხოვს ხატია ვიბლიანის აღკვეთ ღონისძიებად გამოყენებული იყოს პატიმრობა და არა გირაო, რადგან, ვერ ვგრძნობთ თავს დაცულად, დამნაშავე ცხოვრობს ძალიან ახლოს და ნებისმიერ დროს შეიძლება გადაეყაროს ბავშვს. ასევე საფრთხეშია მთელი საზოგადოება, არავინ იცის, კიდევ ვის გაიმეტებს და უმოწყალოდ სცემს ეს ქალბატონი.
გაოცებას იწვევს ის ფაქტიც რომ, მისი არ დაკავების მიზეზი შეიძლება გახდეს, მისი მცირეწლოვანი ბავშვის მეურვეობა, რომელზეც მან ისევე, როგორც მოზარდზე ფსიქოლოგიურად იძალადა იმ საღამოს და ატირებულ ბავშვს ეს ყველაფერი აყურებინა. ქალს რომელსაც პირველ ბავშვზე დედობა აქვს ჩამორთმეული, თქვენი აზრით მეორეს ნორმალურ პირობებში ზრდის?
ახლა აცხადებს, არ ვიცოდი არასრულწლოვანი რომ იყოო. არადა, მაშინ ხომ ჰქონდა გაცნობიერებული,მოზარდთან რომ ჰქონდა საქმე, როცა მიმართავდა: „შე, წვინტლიანო, ნაბიჭვარო, მე შენ გასწავლი ჭკუას“ და თავს ვინ ვის დაესხა ესეც მშვენივრად ჩანს კადრებში, მოწმეებიც ადასტურებენ მაღაზიაში“, – წერია განცხადებაში.
არასრულწლოვანზე ძალადობისთვის ბრალდებულ მკლავჭიდელ ხატია ვიბლიანს აღკვეთის ღონისძიების სახით 3 000-ლარიანი გირაო შეეფარდა. გადაწყვეტილება მოსამართლე ლელა მარიდაშვილმა მიიღო.
