აშშ-ის სურსათისა და წამლის ადმინისტრაციის (FDA) გადაწყვეტილებით, „ფაიზერმა“ 12-15 წლის ასაკობრივი ჯგუფის ასაცრელად fda-ის ავტორიზაცია მიიღო.
თუმცა ამერიკის დაავადებათა კონტროლისა და პრევენციის ცენტრის (CDC) მრჩეველთა საბჭო ოთხშაბათს იმსჯელებს, გასცეს თუ არა დაავადებათა კონტროლის ცენტრმა რეკომენდაცია ამ ახალი ასაკობრივი ჯგუფის აცრაზე. 12-15 წლის ასაკობრივი ჯგუფის აცრა სწორედ ამ რეკომენდაციაზე იქნება დამოკიდებული.
„ფაიზერი“ აშშ-ში პირველი ვაქცინაა, რომელმაც მოზარდების ასაცრელად FDA-ის ავტორიზაცია მიიღო. აქამდე ამ ვაქცინით აშშ-ში 16 წელს ზემოთ მოქალაქეები იცრებოდნენ. „მოდერნასა“ და „ჯონსონ & ჯონსონის“ ვაქცინით კი 18+ ასაკის მოქალაქეები იცრებიან.
ამ დაშვებას წინ უძღოდა „ფაიზერის“ მიერ FDA-ისთვის მიწოდებული მონაცემების განხილვა. კომპანიის ცნობით, მარტის ბოლოსთვის კლინიკურმა ცდებმა, რომლებშიც 2 260 12-დან 15 წლამდე ადამიანი მონაწილეობდნენ, აჩვენეს, რომ ვაქცინა 100%-ით ეფექტურია.
წამლის ადმინისტრაციამ გადაწყვეტილება „ფაიზერის“ ეფექტურობისა და უსაფრთხოების მაჩვენებლების მიხედვით მიიღო.
„ვაქცინაზე რეაქცია შესანიშნავი იყო და ფაქტობრივად 16-25 ასაკობრივ ჯგუფზე უკეთესიც“, – აცხადებს წამლის ადმინისტრაციის დირექტორი.
