ბათუმელ მოქალაქეებს აქციაზე ზებრაზე სიარულის გამო სასამართლოში იბარებენ.
„საქართველოს ახალგაზრდა იურისტთა ასოციაციის” განცხადებით, საქმე ეხება 31 იანვარს და 15-მდე ადამიანს.
„გუშინ დაახლოებით 10 საათზე დამირეკეს და მითხრეს, რომ გზას ვკეტავდი ინტენსიურად გადასვლა-გადმოსვლით და ამის გამო გვედავებიან. სასამართლო დანიშნეს 17 თებერვალს. რა თქმა უნდა, უსამართლო სასამართლოზე მისვლას და დასწრებას ვაპირებთ და ალბათ იქ მოვისმენთ დეტალებს, მტკიცებულებებს, ვიდეო კადრებს, როგორ ვკეტავდით და განზრახ და ზებრაზე გადასვლით როგორ ვუშლიდი ხალხს და მოძრაობას ხელს და ამით კანონი და წესი როგორ დავარღვიე”. – თქვა ერთ-ერთმა მოქალაქემ „ტვ პირველთან”.
„ჩვენ გვედავებიან ზებრაზე გადასვლა-გადმოსვლით გზის შეფერხებას და სასაცილოა, როცა საფეხმავლო ბილიკზე ან ზებრაზე აჯარიმებენ ქვეითად მოსიარულეებს. რა თქმა უნდა, ეს არის დაშინების და რეპრესიის ერთ-ერთი მეთოდი, მაგრამ ამით ვერც ბათუმში, ვერც თბილისში და ზოგადად საქართველოში ვერავის შეაშინებენ”. – თქვა აქტივისტმა, სტუდენტმა არჩილ ბერიძემ.
მოქალაქეები სასამართლოში ადმინისტრაციული კოდექსის 174-ე მუხლის მე-4 ნაწილის დარღვევის საბაბით დაიბარეს, რაც „სასამართლოს შესასვლელის ბლოკირება, შეკრების ან მანიფესტაციის მოსამართლის საცხოვრებელ ადგილას ან საქართველოს საერთო სასამართლოში ჩატარებას” გულისხმობს და „ოცნების” მიერ შეტანილი რეპრესიული ცვლილებებით, რომლებიც 2025 წლის იანვრიდან მოქმედებს, იწვევს დაჯარიმებას 5 000 ლარის ოდენობით ან ადმინისტრაციულ პატიმრობას 60 დღემდე ვადით.
