„ქართული ოცნების“ საგარეო საქმეთა სამინისტროს ცნობით, მაკა ბოჭორიშვილი აშშ-ის კონგრესის წარმომადგენელთა პალატის საგარეო საქმეთა კომიტეტის აპარატის წევრებს შეხვდა.
უწყების ცნობით, მხარეებმა განიხილეს საქართველოსა და აშშ-ის ურთიერთობების აქტუალური საკითხები და რეგიონში მიმდინარე პროცესები.
„განსაკუთრებული აქცენტი გაკეთდა საქართველოს, როგორც რეგიონული დამაკავშირებლის როლზე და ამ მხრივ განხილულ იქნა შუა დერეფნის სატრანსპორტო პოტენციალი. საქართველო მიესალმა აშშ-ის აქტიურ ჩართულობას რეგიონში.
…მინისტრმა კიდევ ერთხელ დაადასტურა ქართული მხარის სურვილი და მზადყოფნა აშშ-სთან ურთიერთობების გადატვირთვასთან და სტრატეგიული პარტნიორობის განახლებასთან დაკავშირებით“, – აღნიშნულია უწყების რელიზში.
აშშ-ის საელჩოს ინფორმაციით, კონგრესის თანამშრომელთა დელეგაციას დაგეგმილი აქვს შეხვედრები საქართველოს ოფიციალურ პირებთან და ოპოზიციის ლიდერებთან.
მათივე ცნობით, დელეგაცია ეწვევა წეროვანში დევნილთა დასახლებასაც, რათა გაეცნონ საქართველოში არსებულ ვითარებას.
