ცაგერისა და ლენტეხის ეპარქიის მიტროპოლიტ სტეფანეს კორონავირუსი დაუდასტურდა. ინფორმაცია „პუბლიკას“ საპატრიარქოს პრესსპიკერმა, დეკანოზმა ანდრია ჯაღმაიძემ დაუდასტურა.
ჯაღმაიძის ცნობით, მიტროპოლიტს ვირუსი უსიმპტომოდ აქვს. საპატრიარქოს პრესპიკერმა განმარტება სოციალურ ქსელშიც გაავრცელა.
მიტროპოლიტი სტეფანე ერთ-ერთი იყო იმ მღვდელმსახურებიდან, რომელიც კორონავირუსის გამო წირვისა და ზიარების წესის შეცვლას ეწინააღმდეგებოდა. მას ღვთისმსახურება არც მუნიციპალიტეტში მკაცრი შეზღუდვების დაწესების შემდეგ შეუწყვეტია.
„ზიარებასთან დაკავშირებით ახალი გარემოება არასოდეს არ იქნება. სახლში დაჯდეს მრევლი და ტელევიზორში უყუროს [სააღდგომო წირვას], ეს ზღაპარია“, – ამბობდა მიტროპოლიტი პირველ აპრილს, როცა ფაქობრივად სრული კარანტინის პერიოდში სააღდგომო ლიტურგიის წესის შეცვლაზე იყო მსჯელობა.
დღეს, 26 ოქტომბერს საქართველოში კორონავირუსის 1872 ახალი შემთხვევა დაფიქსირდა, მათგან 7 რაჭა-ლეჩხუმში. StopCov.ge-ზე განახლებული მონაცემებით, გარდაიცვალა კიდევ 14 კოვიდპაციენტი და გამოჯანმრთელდა 603 ადამიანი.
