„საერთაშორისო გამჭირვალობა – საქართველო“ აქვეყნებს ინფორმაციას, სადაც აღნიშნულია, რომ საქართველოს პარლამენტის წევრის, ვიქტორ ჯაფარიძისა და მისი შვილის, ოთარ ჯაფარიძის წილობრივ მფლობელობაში არსებული კომპანიები ტენდერებს იგებენ. 2018 წლიდან დღემდე მიღებული კონტრაქტების ჯამურმა ღირებულებამ 6 264 688 ლარი შეადგინა.
ვიქტორ ჯაფარიძე 16 წელია, საქართველოს პარლამენტის წევრია. იგი ორჯერ იყო მესტიის მაჟორიტარი დეპუტატი, ბოლოს კი პარლამენტის წევრი „ქართული ოცნება-დემოკრატიული საქართველოს“ პარტიული სიით გახდა.
შპს „სეტი+“-ის გამარტივებული შესყიდვები
ვიქტორ ჯაფარიძე ფლობს შპს „სეტი+“-ის 33,3% წილს – მან ეს ინფორმაცია 2019 წლის დეკემბერში შევსებულ დეკლარაციაშიც აღნიშნა. სახელმწიფო შესყიდვებში შპს „სეტი+“ 2019 წლის ივლისიდან არის ჩართული და 10 გამარტივებული შესყიდვა აქვს მიღებული, ჯამური ღირებულებით 57 762 ლარი.
შპს „სეტი+“-სგან სასტუმროს, რესტორნისა და კვების მომსახურება შეისყიდეს მესტიის მერიამ, საქართველოს ტურიზმის ეროვნულმა ადმინისტრაციამ და სურსათის ეროვნულმა სააგენტომ.
ოთარ ჯაფარიძის კომპანიების ტენდერები
შვიდ კომპანიაში ფლობს წილს ვიქტორ ჯაფარიძის შვილი, ოთარ ჯაფარიძე, მათ შორისაა შპს „ექსპერტ ჰაუსის“ წილი – 24%.
შპს „ექსპერტ ჰაუსი” 2017 წლიდან დღემდე 14 ტენდერში მონაწილეობდა და 6 შემთხვევაში გაიმარჯვა. ხელშეკრულებების ჯამურმა ღირებულებამ 2 571 006 ლარი შეადგინა.
შპს „ექსპერტ ჰაუსმა“ მშენებლობასთან დაკავშირებული და საინჟინრო მომსახურება თითოჯერ გაუწია ა(ა)იპ „რუსთავის კორპუსს“ (2018 წ.), ხობის (2019 წ.), ბოლნისის (2019 წ.), ზუგდიდის (2020 წ.), ყვარლისა (2020 წ.) და ლაგოდეხის (2020 წ.) მუნიციპალიტეტებს.
ოთარ ჯაფარიძე ასევე არის შპს „TOB კონსტრაქშენის“ 50% წილის მფლობელი. 2018 წელს შპს სულ ორ ტენდერში მონაწილეობდა და ორივეჯერ უკონკურენტოდ გაიმარჯვა (განაცხადის ნომერი: GEO180000241, GEO180000181), ორივე შემთხვევაში შემსყიდველი „სახელმწიფო სამშენებლო კომპანია“ იყო, ხელშეკრულების ჯამურმა ღირებულებამ კი 3 635 920 ლარი შეადგინა. შესყიდვის საგანს ქვიშა-ღორღი და ბეტონი წარმოადგენდა. როგორც სატენდერო დოკუმენტაციით ირკვევა „სახელმწიფო სამშენებლო კომპანიას“ მოთხოვნილი ჰქონდა, რომ ორივე ტენდერის შემთხვევაში მიმწოდებლის ქარხანა უნდა ყოფილიყო მესტიის მუნიციპალიტეტის სოფელი იფარიდან არაუმეტეს 30 კილომეტრის რადიუსში.
აღსანიშნავია, რომ სწორედ ამ პერიოდში „სახელმწიფო სამშენებლო კომპანია“ ზუგდიდი – ჯვარი – მესტია – ლასდილის საავტომობილო გზის 165-177 კმ მონაკვეთის სარეაბილიტაციო სამუშაოებს აწარმოებდა, ეს სამუშაოები კი „საქართველოს საავტომობილო გზების დეპარტამენტის“ ტენდერის (განაცხადის ნომერი: DAP170000180) ფარგლებში შესრულდა, რომელშიც 2017 წლის დეკემბერში სწორედ „სახელმწიფო სამშენებლო კომპანიამ“ გაიმარჯვა.
პოლიტიკური შემოწირულობები
„საერთაშორისო გამჭვირვალობა – საქართველოს“ მოკვლევის მიხედვით, ვიქტორ ჯაფარიძე, მეუღლე ნათია ხვისტანი და ვიქტორ ჯაფარიძის შვილის, ოთარ ჯაფარიძის ბიზნესპარტნიორები მსხვილი შემომწირველებიც არიან – მათ 2012 წლიდან დღემდე მმართველ პარტია „ქართულ ოცნება-დემოკრატიულ საქართველოს“ ჯამში 360 000 ლარი, ხოლო 2018 წელს პრეზიდენტობის კანდიდატ სალომე ზურაბიშვილს 50 000 ლარი შესწირეს:
- ვიქტორ ჯაფარიძემ 2012-2017 წლებში ოთხჯერ, ჯამში 120 000 ლარი შესწირა პარტია „ქართულ ოცნება-დემოკრატიულ საქართველოს“;
- ვიქტორ ჯაფარიძის მეუღლემ – ნათია ხვისტანმა 2017 წელს 55 000 ლარი შესწირა „ქართულ ოცნებას“, 2018 წელს კი – 50,000 ლარი პრეზიდენტობის კანდიდატ სალომე ზურაბიშვილს;
- ოთარ ჩართოლანმა – შპს „სეტი+“-ის 66.7% წილის მფლობელმა, 2014-2016 წლებში, ორჯერ, ჯამში 103 000 ლარი შესწირა „ქართულ ოცნებას“ (ოთარ ჩართოლანი ასევე არის ვიქტორ ჯაფარიძის მეუღლის, ნათია ხვისტანის და შვილის ოთარ ჯაფარიძის ბიზნესპარტნიორი შემდეგ კომპანიებში: შპს “„სეტი” {50% წილი}, შპს „ქცია 94” {20.99% წილი}, შპს „დიდველი +” {10% წილი}, შპს „ოთო” {33.3% წილი} და შპს „All seasons” {50% წილი}
- კახაბერ გამისონიამ – შპს „ექსპერტ ჰაუსის“ 51% წილის მფლობელმა და დირექტორმა – 2014 წელს 15 000 ლარი შესწირა „ქართულ ოცნებას“;
- მურად ჯობავამ – შპს „ექსპერტ ჰაუსის“ 5% წილის მფლობელმა – 2014-2017 წლებში სამჯერ, ჯამში 47 000 ლარი შესწირა მმართველ პარტიას;
- ოთარ მაზმიშვილმა – შპს „TOB კონსტრაქშენის“ დირექტორმა – 2017 წელს 20 000 ლარი შესწირა პარტია „ქართულ ოცნებას“.
ხარვეზი ქონებრივ დეკლარაციაში
ვიქტორ ჯაფარიძეს თავისი და მეუღლის პოლიტიკური შეწირულობების შესახებ ინფორმაცია დეკლარაციაში არც ერთხელ არ მიუთითებია. „საჯარო დაწესებულებაში ინტერესთა შეუთავსებლობისა და კორუფციის შესახებ“ კანონის თანახმად, თანამდებობის პირი ვალდებულია, დეკლარაციაში ასახოს ფულადი გასავალი, რომლის ოდენობაც აღემატება 5 000 ლარს. როგორც ვიქტორ ჯაფარიძის, ასევე მისი მეუღლის, ნათია ხვისტანის მიერ პარტიებისათვის შეწირული თანხა თითოეულ შემთხვევაში 5 000 ლარს ბევრად აღემატებოდა.
„საერთაშორისო გამჭვირვალობა – საქართველო“ მოუწოდებს სახელმწიფო უსაფრთხოების სამსახურის ანტიკორუფციულ სააგენტოს და გენერალურ პროკურატურას, შეისწავლონ ვიქტორ ჯაფარიძესთან და მის შვილთან დაკავშირებული კომპანიების თითოეული ტენდერი და დაადგინონ, ხომ არ იყო ისინი ზემოაღნიშნული შპს-ებისთვის სასურველ პირობებში გამოცხადებული და შეიცავს თუ არა კორუფციის შესაძლო ნიშნებს.
„ასევე, მივმართავთ საჯარო სამსახურის ბიუროს, შეისწავლოს ვიქტორ ჯაფარიძის ქონებრივი მდგომარეობის დეკლარაცია და მოახდინოს შესაბამისი რეაგირება“, – ამბობენ ორგანიზაციაში.
