EFJ ვასილ ივანოვ-ჩიქოვანზე: მისი მიზანი მაუწყებლის და მისი პრინციპების დაცვაა

ევროპის ჟურნალისტთა ფედერაციის (EFJ) ხელმძღვანელი რიკარდო გუტიერეზი პასუხობს საზოგადოებრივი მაუწყებლის იმ თანამშრომლებს, რომლებმაც ევროპის ჟურნალისტთა ფედერაციასა და მედიის თავისუფლებაზე მომუშავე სხვა ორგანიზაციებს წერილით მიმართეს.

ორგანიზაციის წერილს „რადიო თავისუფლება” ავრცელებს და ამბობს, რომ ის მათ კონფიდენციალურმა წყარომ მიაწოდა.

„ევროპის ჟურნალისტთა ფედერაციამ საზოგადოებრივი მაუწყებლების ევროპულ გაერთიანებას სთხოვა საქართველოს საზოგადოებრივი მაუწყებლის დამოუკიდებლობის გარანტად ყოფნა და ჟურნალისტების დაცვა ნებისმიერი პოლიტიკური გავლენებისგან მათი სამუშაოს შესრულებისას. იმედი მაქვს, თქვენ ამის წინააღმდეგი არ ხართ!

მეორე მხრივ, თუ საზოგადოებრივი მაუწყებლის ხელმძღვანელობა არ იცავს ევროპის მაუწყებელთა კავშირის პრინციპებს, ისინი თავად რიცხავენ თავს ამ ორგანიზაციიდან.

ვასილ ივანოვ-ჩიქოვანის საქმეს რაც შეეხება, მიგვაჩნია, რომ მისი ეთერიდან მოხსნის გადაწყვეტილება პოლიტიკურად მოტივირებულია და ეს მივწერე კიდეც 12 თებერვალს საზოგადოებრივი მაუწყებლის ბორდის წევრებს. სრულიად მიუღებლად და გაუმართლებლად მივიჩნევ იმას, რომ მისი შემთხვევა უნდა გამოიძიოს საზოგადოებრივი მაუწყებლის პოლიტიზებულმა ბორდმა. ევროპის ჟურნალისტთა ფედერაცია კვლავ მხარს უჭერს ვასილ ივანოვ-ჩიქოვანს და საზოგადოებრივი მაუწყებლის ჟურნალისტებს, რომლებიც რაიმე ტიპის პოლიტიკურ ზეწოლას შეიძლება განიცდიდნენ.

ვასილ ივანოვ-ჩიქოვანს არცერთ თავის საჯარო განცხადებასა და ინტერვიუში არ გაუმხელია რაიმე სახის კონფიდენციალური ინფორმაცია. მას საკუთარი განცხადებებით არ შეულახავს საზოგადოებრივი მაუწყებლის რეპუტაცია. პირიქით, მისი მიზანი მაუწყებლის და მისი პრინციპების დაცვაა. ევროპის ჟურნალისტთა ფედერაცია მიესალმება ჟურნალისტების მხრიდან ყველა ამგვარ საჯარო ინტერვენციას, რომლებიც საზოგადოებრივი ინტერესებით არის ნაკარნახევი – ასეთი ჟურნალისტები დაცული უნდა იყვნენ, როგორც მამხილებლები და არ შეიძლება გახდნენ შურისძიების მსხვერპლები”, – წერია განცხადებაში.

ამავე წერილში, საზოგადოებრივი მაუწყებლის სამეურვეო საბჭოს ხელმძღვანელი ვასილ მაღლაფერიძე და საბჭოს წევრები გიორგი კოხრეიძე და გია იაკობაშვილი ღიად არიან დასახელებული, როგორც პოლიტიკური გავლენების მქონე პირები, რომელთა მიმართაც საზოგადოების ნდობის საკითხი სადავოა.

„მედიაჩეკერმა“ 22 თებერვალს გაავრცელა ინფორმაცია, რომ მოიპოვეს წერილი, რომლითაც საზოგადოებრივი მაუწყებლის მენეჯმენტის მხარდამჭერმა თანამშრომლებმა საერთაშორისო ორგანიზაციებს მიმართეს.

მათი ცნობით, 20 თებერვალს 9 საერთაშორისო ორგანიზაციამ საზოგადოებრივი მაუწყებლის მიმდინარე და ახალი ამბების განყოფილების თანამშრომლისგან მიიღო წერილი. წერილში, რომელიც „მედიაჩეკერს“ კონფიდენციალურმა წყარომ მიაწოდა, საზოგადოებრივი მაუწყებლის 142 თანამშრომელი საერთაშორისო ორგანიზაციებს მხარდაჭერას სთხოვს.