სახალხო დამცველი მოუწოდებს ეკონომიკისა და მდგრადი განვითარების სამინისტროს – ჩაერთოს შუქრუთის მოსახლეობასა და კომპანიას შორის მოლაპარაკებების პროცესში, როგორც მედიატორი, რათა დაცული იყოს მოქალაქეთა როგორც საკუთრების, ასევე ჯანსაღ გარემოში ცხოვრების უფლება.
ომბუდსმენის აპარატის ცნობით, აგრძელებენ საქმის შესწავლას ჯანსაღ გარემოში ცხოვრების უფლების კუთხით, ასევე შეკრების ერთ-ერთი მონაწილის მიმართ შესაძლო ზეწოლის განხორციელების ფაქტზე.
„სახალხო დამცველი პირველივე დღეებიდან ადევნებს თვალს ჭიათურის მუნიციპალიტეტის სოფელ შუქრუთში მიმდინარე მოვლენებს, სადაც მოსახლეობა შპს „ჯორჯიან მანგანეზის“ მადნის მოპოვებითი სამუშაოების შედეგად დაზიანებული საკუთრების სანაცვლოდ, სამართლიან კომპენსაციას ითხოვს. დაზარალებულები ასევე, პროცესში სახელმწიფოს ჩართვას ითხოვენ.
უკვე 105 დღეა, რაც აქციები მიმდინარეობს, ხოლო 20 დღეზე მეტია აქციის მონაწილეთა ნაწილმა პროტესტის უკიდურეს ფორმას მიმართა – პირი ამოიკერა და შიმშილობს.
საკითხის შესწავლის მიზნით, სახალხო დამცველის წარმომადგენლები ადგილზე შეხვდნენ აქციის მონაწილეებს და მათი მოთხოვნები მოისმინეს. ასევე, გვაქვს მუდმივი კონტაქტი აქციის ორგანიზატორებთან.
კომპანიის წარმომადგენლებთან აქციის მონაწილეების მოთხოვნების განხილვის მიზნით, 2021 წლის 31 მაისს სახალხო დამცველის წარმომადგენლებს კომუნიკაცია ჰქონდათ კომპანია „ჯორჯიან მანგანეზის“ წარმომადგენელთან, რომელმაც განაცხადა, რომ კომპანიამ შუქრუთის დაზარალებულ მცხოვრებთა ქონება საბაზრო ღირებულების გათვალისწინებით შეაფასა. ამასთან, წარმომადგენლის თქმით, კომპენსაციის გაცემა არ გულისხმობს ქონებაზე საკუთრებისა და სარგებლობის უფლების ჩამორთმევას. კომპანიის წარმომადგენლის ცნობით, მოსახლეობასთან ხელშეკრულებები ეტაპობრივად, დაზიანების ხარისხის გათვალისწინებით ფორმდება.
აღსანიშნავია, რომ გარდა იმისა, რომ პროტესტის მონაწილეები უნდობლობას უცხადებენ კომპანიის მიერ ჩატარებულ შეფასებებს და ითხოვენ კომპენსაციის ოდენობა სსიპ „ლევან სამხარაულის ექსპერტიზის ბიურომ“ განსაზღვროს, სადავოა მხარეებს შორის ქონების შეფასების მეთოდოლოგიაც. (როგორც ჩვენთვის გახდა ცნობილი, კომპანიის სპეციალურმა მმართველმა საჯაროდ განაცხადა, რომ კომპანია მზად არის ზარალის ოდენობის შეფასების მიზნით სსიპ „ლევან სამხარაულის ექსპერტიზის ბიუროს“ მიმართოს). ასევე, მოსახლეობის მოთხოვნაა, შესაბამისი ხელშეკრულებით გაიწეროს კომპანიის მიერ კომპენსაციის გადახდის ვალდებულება და ვადები.
შექმნილი მძიმე ვითარების გათვალისწინებით, საქართველოს სახალხო დამცველი მოუწოდებს ეკონომიკისა და მდგრადი განვითარების სამინისტროს – ჩაერთოს შუქრუთის მოსახლეობასა და კომპანიას შორის მოლაპარაკებების პროცესში, როგორც მედიატორი, რათა დაცული იყოს მოქალაქეთა როგორც საკუთრების, ასევე ჯანსაღ გარემოში ცხოვრების უფლება.
სახალხო დამცველი აგრძელებს საქმის შესწავლას ჯანსაღ გარემოში ცხოვრების უფლების კუთხით, ასევე შეკრების ერთ-ერთი მონაწილის მიმართ შესაძლო ზეწოლის განხორციელების ფაქტზე“, – ნათქვამია განცხადებაში.
