საქართველოს ეროვნულმა ბანკმა წაშალა განცხადება, სადაც წერდა, რომ მზად იყო, აშშ-ის მიერ სანქცირებული „ვითიბი ბანკ ჯორჯია“ „შესაბამისი ფინანსური რესურსით უზრუნველეყო“.
ბანკი განმარტებით წერილსაც აქვეყნებს.
„ეროვნული ბანკი მოქმედებს სს „ვითიბი ბანკი ჯორჯიაზე“, როგორც ვითიბი ბანკის ჯგუფში შემავალ საფინანსო ინსტიტუტზე აშშ, ევროკავშირის, გაერთიანებული სამეფოს და სხვა სახელმწიფოებს მიერ დაწესებული ფინანსური სანქციების გათვალისწინებით. შესაბამისად, ბანკს შეეზღუდა დოლარში, ევროში, ფუნტსა და სხვა უცხოურ ვალუტებში გადარიცხვები.
ამავდროულად, ჩვენი ამოცანაა, სანქციების პირობების შესრულების გათვალისწინებით, დაიცვას ბანკის მეანაბრეების, საქართველოს მოქალაქეების, ინტერესები და იზრუნოს ქვეყნის საფინანსო სისტემის სტაბილურობაზე.
სწორედ ამიტომ, ეროვნული ბანკი ინტენსიურ უწყვეტ რეჟიმში აკვირდება მოვლენებს და მზად არის, საჭიროების შემთხვევაში, საერთაშორისო სტანდარტებისა და კანონმდებლობით გათვალისწინებული ინსტრუმენტების გამოყენებით დაიცვას ბანკის მეანაბრეების ინტერესები“. – ვკითხულობთ ახალ განცხადებაში.
