ევროპარლამენტარი, ევროპის „მწვანეთა პარტიის“ წევრი ვიოლა ფონ კრამონი „კავკასიური სახლის“ წერილს პასუხობს.
„კავკასიურმა სახლმა“ ევროპარლამენტარს 2 დღის წინ ღია წერილით მიმართა. წერილში, რომელსაც ხელს კავკასიური სახლის რამდენიმე თანამშრომელი და გამგეობის თავმჯდომარე, ნაირა გელაშვილი აწერს ხელს, ნათქვამია, რომ ისინი ქართველი ხალხის გულისტკივილს უზიარებენ ევროპარლამენტარს.
„პატივცემულო ქ-ნ ფონ კრამონ-ტაუბადელ, ჩვენთვის აბსოლუტურად გაუგებარია, რატომ დახარჯეთ ამდენი დრო და ენერგია ბიუჯეტის ქურდის, ქალაქის განადგურებასა და მშვიდობიანი დემონსტრაციების დარბევაში მრავალგზის მხილებული პირის, სისხლის სამართლის დამნაშავის გადარჩენისათვის, მისი პოლიტპატიმრის მანტიით შემკობისათვის“, – ნათქვამია წერილში.
ევროპარლამენტარმა ღია წერილს გუშინ „ტვიტერზე“ უპასუხა.
„წერილის კითხვა დავიწყე დიდი ინტერესით და დავასრულე ასეთივე დიდი იმედგაცრუებით. ამ პროცესში გამახსენდნენ „პერსონაჟები“ გივი მარგველაშვილის ნაწარმოებიდან „Verfasser Unser“, რომლებიც გაიძახიან – „ვითხოვთ უკეთეს ნაწერს“ („Wir fordern eine bessere Verfassung“).
ბრძანდებით რა სახელგანთქმული მწერლები, ფილოლოგები და აკადემიკოსები, უცილობლოდ დამეთანხმებით, რომ კარგად წერა შედეგია კარგად კითხვის.
მე, როგორც საქართველოსა და მისი ხალხის უპირობო და უკომპრომისო მეგობარს, არაერთხელ გამომიხატავს ჩემი პოზიცია უახლეს მოვლენებზე. ყველაზე ცხადად იგი წარმოჩინდა ჩემს ვებგვერდზე 13 მაისს გამოქვეყნებულ განცხადებაში, რომელიც, ასევე, ფართოდ გააშუქა ქართულმა მედიამ.
სამწუხაროა, რომ თქვენ გადაწყვიტეთ, გამოგეტოვებინათ ესოდენ მნიშვნელოვანი ნაბიჯი, რომელსაც განცხადების წაკითხვა ეწოდება. რომ არა ეს, ამაცილებდით ამ წერილის წერის, ხოლო თავს, ამ წერილის კითხვის უხერხულობას.
თქვენ რომ მე წინასწარ შემხმიანებოდით, როგორც ეს „საერთო პოლიტიკური და ეთიკური ღირებულებების“ მქონე მოკავშირეს შეშვენის, კიდევ ერთხელ სიამოვნებით განგიმარტავდით ჩემს პოზიციას და ამ გზით თავიდან აირიდებდი თქვენი წერილის სიმცდარითა და დეზინფორმაციით გაჯერებას.
ასევე, ზედმეტია ჩემთვის სააკაშვილის რეჟიმის სისასტიკეების შეხსენება. ეს ყველაფერი ჩემთვის კარგადაა ცნობილი. გერმანიის პარლამენტის წევრობისას მე გახლდით სააკაშვილის მთავრობის ხმამაღალი კრიტიკოსი. ამის გამო, მან და მისმა გუნდმა შემრაცხა პერსონა ნონ გრატად და აქტიურად (მაგრამ არა ყოველთვის წარმატებით) ცდილობდნენ საქართველოში გამართულ ღონისძიებებში ჩემ დაბლოკვას. 2012-ში, მეც, მილიონობით ქართველის გვერდით, იმედითა და კეთილი მოლოდინით შევყურებდი „ქართულ ოცნებას“. ვაი, რომ იმედი გახუნდა.
გარდა ამისა, არ ვსაჭიროებ თქვენს მეურვეობაა. შესანიშნავად მომეხსენება „ერთიანი ნაციონალური მოძრაობის“ საეჭვო მეთოდები და სწორედ ამიტომ საქართველოს შესახებ ინფორმაციას უდიდესწილად ვიღებ ექპერტების, მკვლევარების, დიპლომატებისა და, ხშირად, რიგითი ქართველებისგან.
თქვენ ამტკიცებთ, რომ მე „აქტიურად ვლობირებდი რამდენიმე დატუსაღებული ქართველი პოლიტიკოსის გათავისუფლებას“. ეს არის სრული და მტკნარი სიცრუე. არც ჩემს ოფიციალურ განცხადებაში და არც ინტერვიუებში არ მომითხოვია ვინმეს გათავისუფლება. ასევე, სიცრუეა, როცა ამტკიცებთ, რომ მე თითქოს ვიღაც „პოლიტიკურ პატიმრად“ გამოვაცხადე. არასოდეს გამომიყენებია ეს სიტყვები. მე ჩემს საქმიანობას ვეკიდები უდიდესი პასუხისმგებლობით, ხოლო თქვენი ქვეყნის მომავალს უდიდესი ზრუნვით. სწორედ ამიტომ ვარჩევ სიტყვებს მაქსიმალური სიზუსტით. ამავდროულად მოველი, რომ თქვენ აირჩევთ ამ სიტყვების სწორად წაკითხვას, სანამ დაუსაბუთებელი ბრალდებების წაყენებას მიყოფდთ ხელს.
ჩემი რჩევა (და არა თხოვნა ან მოთხოვნა) საქართველოს მთავრობის მიმართ არის იგივე, რაზეც ხალხი 2012 წელს ოცნებობდა. დემოკრატიული პრინციპების პატივისცემა და ობიექტური, გამჭვირვალე და პოლიტიკური ჩარევისგან თავისუფალი სასამართლო სისტემა. სამწუხაროდ, როგორც დამოუკიდებელი ექსპერტები და მკვლევრები ადასტურებენ, ამ სფეროებში ძალიან სამწუხარო უკან დახევის ტრენდი გამოიკვეთა“, – ნათქვამია ევროპარლამენტარის წერილში.
თარგმანი აღებულია ევროპარლამენტარ ვიოლა ფონ კრამონის ოფიციალური ვებგვერდიდან.
