შინაგან საქმეთა სამინისტროს ინფორმაციით, პოლიციამ არასრულწლოვანი გოგონასთვის თავისუფლების უკანონოდ აღკვეთისთვის, 23 წლის ე.ბ., 42 წლის ც.ა., 46 წლის ბ.ბ. და 25 წლის ა.ბ. დააკავა.
„გამოძიებით დადგინდა, რომ გარდაბნის მუნიციპალიტეტის ერთ-ერთ სოფელში, ე.ბ.-მ თავისივე დედისა და 2 ახლობელი ქალის დახმარებით, ცოლად შერთვის მიზნით, არასრულწლოვან თანასოფლელ გოგონას – 2005 წელს დაბადებულ ს.ბ.-ს თავისუფლება უკანონოდ აღუკვეთა“, – აღნიშნულია შსს-ს განცხადებაში.
უწყების ცნობით, პოლიციამ ოთხივე პირი მოსამართლის განჩინების საფუძველზე, ბრალდებულის სახით დააკავა.
შინაგან საქმეთა სამინისტროს განცხადებით, წინასწარი შეთანხმებით ჯგუფის მიერ არასრულწლოვნისთვის თავისუფლების უკანონო აღკვეთის ფაქტზე გამოძიება საქართველოს სისხლის სამართლის კოდექსის 143-ე მუხლის მე-3 ნაწილის „ა” და „დ“ ქვეპუნქტებით მიმდინარეობს და დანაშაული 7-დან 10 წლამდე ვადით თავისუფლების აღკვეთას ითვალისწინებს.
