თბილისში, ვაჟა-ფშაველას გამზირზე შინაგან საქმეთა სამინისტროს თანამშრომლის მიერ „ბრმა ტყვიით“ მოკლული ქალის სიძე, თემურ პირველაშვილი შემთხვევის გარემოებებს აღწერს.
„კომპიუტერთან იჯდა თვითონ, დედა ტელევიზორს უყურებდა, ცოტა მოშორებით და მეუღლე და შვილიც საძინებელ ოთახში ტელევიზორს უყურებდნენ. რამდენიმე გასროლა იყო, მერე გაჩერდა, მერე ისევ გაგრძელდა [გასროლის დისტანცია] 560 მეტრი იყო, როგორც ექსპერტიზამ დაადგინა. გავიგეთ, რომ შინაგან საქმეთა სამინისტროს თანამშრომელია დაკავებული. ოაჯხთან შემხებლობაში არ იყო, სახელი და გვარიც არ ვიცი. ყველა იძახის, რომ პოლიციელია”, – განუცხადა ჟურნალისტებს გარდაცვლილის სიძემ.
თბილისში, ვაჟა-ფშაველას გამზირზე ქალის გაუფრთხილებლობით მკვლელობის ბრალდებით პოლიციელი დააკავეს, – ამის შესახებ განცხადებას პროკურატურა ავრცელებს.
„საქმეზე ჩატარებული გამოძიებით დგინდება, რომ ნასვამ მდგომარეობაში მყოფმა ს.გ.-მ საკუთარი საცხოვრებელი ბინის აივნიდან განახორციელა ცეცხლსასროლი იარაღიდან უმისამართო გასროლა. გასროლილი ტყვია თავის არეში მოხვდა მიმდებარე კორპუსში მცხოვრებ თ.ა.-ს, რის შედეგადაც ეს უკანასკნელი გარდაიცვალა.
იმის გათვალისწინებით, რომ შესაძლოა დანაშაული ჩადენილი ყოფილიყო შინაგან საქმეთა სამინისტროს თანამშრომლის მიერ, გამოძიების საწყის ეტაპზევე სისხლის სამართლის საქმე გამოსაძიებლად გადმოეცა თბილისის პროკურატურის საგამოძიებო ნაწილს.
საქმეზე განხორციელდა შემთხვევის ადგილის დათვალიერება. ჩატარდა ბრალდებულის საცხოვრებელი ბინის ჩხრეკა. ბრალდებულის საცხოვრებელი ბინის ჩხრეკისას ამოღებული იქნა გასროლილი ტყვიის მასრები და ცეცხლსასროლი იარაღი. ექსპერტების მიერ განხორციელდა ნიმუშების აღება. მოწმის სახით გამოიკითხა არაერთი პირი. საქმეზე აქტიურად გრძელდება გამოძიება და ტარდება ყველა საჭირო საგამოძიებო და საპროცესო მოქმედება. ს.გ. ბრალდებულის სახით დაკავებულია საქართველოს სსკ-ის 116-ე მუხლით“, – წერს პროკურატურა.
ეს მუხლი გაუფრთხილებლობით სიცოცხლის მოსპობას ითვალისწინებს და ისჯება შინაპატიმრობით ვადით 6 თვიდან 2 წლამდე ან თავისუფლების აღკვეთით ვადით 2-დან 4 წლამდე.
