გერმანია NATO-ს აღმოსავლეთ ფლანგზე, ლიეტუვაში 5000 ჯარისკაცს განალაგებს.
მეორე მსოფლიო ომის შემდეგ ეს პირველი შემთხვევაა, როცა ბერლინი ჯარს განალაგებს თავისი ქვეყნის გარეთ.
ამის მიზეზი რუსეთ-უკრაინის ომია.
Politico-ს თანახმად, გერმანიის სამხედრო ლობისტური ჯგუფის ცნობით, ახლადშექმნილი 45-ე ჯავშანტექნიკის ბრიგადა ოფიციალურად ამოქმედდა ვილნიუსთან გამართული ცერემონიის დროს. დაფუძნდა დროებითი შტაბი, გაცხადდა ბრიგადის გერბი და ერთეული ოფიციალურად ბრიგადის გენერალ კრისტოფ ჰუბერის მეთაურობის ქვეშ მოექცა.
„ჩვენ ნათელი მისია გვაქვს: უზრუნველვყოთ დაცვა, თავისუფლება და უსაფრთხოება ჩვენი ლიეტუველი მოკავშირეებისთვის NATO-ს აღმოსავლეთ ფლაგნზე. ასე მოქცევით ჩვენ დავიცავთ NATO-ს ტერიტორიასაც”. – განაცხადა ჰუბერმა.
გერმანიამ ქვეყნის გარეთ ბრიგადის განლაგების გადაწყვეტილების შესახებ 2023 წელს განაცხადა. ამით შეიცვალა გერმანიის თავდაცვის პოლიტიკა, რომელიც ათწლეულების განმავლობაში თავს არიდებდა ქვეყნის გარეთ თავისი საბრძოლო ჯარების მუდმივ ყოფნას.
დანაყოფი სრულად 2027 წლისთვის ამოქმედდება და საბოლოოდ დაფუძნდება ახალ სამხედრო კომპლექსში რუდნინკაიში, ვილნიუსიდან სამხრეთით დაახლოებით 30 კილომეტრში. მანამდე ჯარები ლიეტუვის დროებითი ბაზებიდან იმოქმედებენ.
გეგმა მოიცავს არა მხოლოდ საბრძოლო ძალებს, არამედ დამხმარე დანაყოფებსაც — სამედიცინო ცენტრს, სასიგნალო დანაყოფს და ბრძანების დამხმარე გუნდებს მრავალ ლოკაციაზე.
ამ დროსთვის ლიეტუვაში განლაგებულია 150 გერმანელი ჯარისკაცი. წლის ბოლომდე ეს რიცხვი 500-მდე გაიზრდება.
