პიანისტი გიორგი გიგაშვილი, რომელმაც რამდენიმე დღის წინ რუბენშტეინის საერთაშორისო საფორტეპიანო კონკურსზე საპრიზო ადგილი დაიკავა, ლაზარე გრიგორიადისისთვის აღკვეთის ღონისძიებად პატიმრობის შეფარდებას ეხმაურება და ლაზარეს მხარდაჭერას უცხადებს.
„ჩემი მხარდაჭერა ლაზარეს“, – წერს გიორგი გიგაშვილი Facebook-ზე.
ლაზარე გრიგორიადისს სოლიდარობა გამოუცხადეს სხვადასხვა საზოგადოებრივმა ჯგუფებმა, ორგანიზაციებმა, პარტიებმა, მოქალაქეებმა. გუშინ პარლამენტთან მისი მხარდამჭერი აქციაც გაიმართა. კიდევ ერთი აქცია დღეს იგეგმება.
ლაზარე გრიგორიადისის აღკვეთის ღონისძიების სახით პატიმრობა შეეფარდა.
გადაწყვეტილებამ დამსწრე საზოგადოების უკმაყოფილება გამოიწვია. სასამართლომ ფოიეში დაძაბული ვითარება, ხმაური და შეძახილები – „მონებო“ იყო.
დაცვის მხარე მოითხოვდა, მის მიმართ გამოყენებული ყოფილიყო გირაო 10 000 ლარის ოდენობით. პროკურატურა აღკვეთის ღონისძიების სახით პატიმრობის შეფარდებას მოითხოვდა.
„ამჯერად, მე მინდა, რომ დუმილის უფლება გამოვიყენო. გავიარო ადვოკატებთან, თავიდან მივცე ჩვენება და…”, – პროცესზე ბრალთან დაკავშირებით ლაზარე გრიგორიადისიმ განაცხადა მხოლოდ ეს.
პროკურატურის პოზიციით, მან აქციებზე – „არა რუსულ კანონს” სამართალდამცავების მიმართულებით ორჯერ ისროლა ე.წ. „მოლოტოვის კოქტეილი“. ასევე ცეცხლი წაუკიდა შსს-ის ავტომანქანას. მას 7-დან 11 წლამდე თავისუფლების აღკვეთა ემუქრება.
