ენმ-ის ყოფილი წევრი, ყოფილი დეპუტატი გივი თარგამაძე წულუკიანის საგამოძიებო კომისიამ დაიბარა.
თარგამაძემ გამოაქვეყნა დოკუმენტი, რომლის თანახმადაც, ის წულუკიანის კომისიის სხდომაზე 3 აპრილს, 11:00 საათზეა დაბარებული.
„ქართული ოცნების” პარლამენტი ასევე შეახსენებს გივი თარგამაძეს, რომ „კომისიის სხდომაზე გამოცხადებაზე უარი სისხლის სამართლის დანაშაულია“.
გივი თარგამაძე ამბობს, რომ კომისიის სხდომაზე მისვლას არ აპირებს.
„ამ რუსის ქალის [ნანა კაკაბაძე] პირადი წერილის საფუძველზე შექმნილ კომისიაზე მოვიდე? მაგ ინტერვიუს მერე რუსებმა ძებნაში რომ გამომაცხადეს, სობარ სუზარი საჯაროდ წუხდა, რადგან, სამწუხაროდ, საქართველოს კონსტიტუციაში ჩანაწერი არ გვაძლევს გადაცემის უფლებას, ეგებ რუსეთის საგამოძიებო კომიტეტის ჯგუფი შემოვუშვათ და აქ, ადგილზე დაკითხონო. ახლა უნდა, მაგათი შედგენილი კითხვარით თავად დამკითხოს? ხო, მართლა, ადამიანის უფლებები მე არ მებარა, მაგას ებარა, მანდ გიზით და რამე თუ გაინტერესებთ, მაგას ჰკითხეთ. უსაფრთხოება ებარა შრომის ინსპექციას, მე უშიშროება მებარა, გენიოსებო“, – დაწერა გივი თარგამაძემ „ფეისბუქზე”.
„ქართული ოცნების“ პარლამენტის საგამოძიებო კომისიას, რომელსაც თეა წულუკიანი ხელმძღვანელობს, „2003-2012 წლებში მოქმედი რეჟიმისა და რეჟიმის პოლიტიკური თანამდებობის პირების საქმიანობის შემსწავლელი კომისია” ჰქვია.
ამასთან, „ოცნების” დადგენილებით, კომისიის გამოსაკვლევ საკითხად განისაზღვრება „2003-2012 წლებში მოქმედი რეჟიმის, ამ რეჟიმის პოლიტიკური თანამდებობისა და პოლიტიკურ პარტიებში გაერთიანებული მოქმედი და ყოფილი თანამდებობის პირების საქმიანობა 2003 წლიდან დღემდე”.
