მოძრაობა „სირცხვილია“ 3 ივლისის აქციისა და „შინ ევროპისკენ“ კამპანიის მომავლის შესახებ განცხადებას ავრცელებს.
განცხადებაში ნათქვამია, რომ საზოგადოების ნაწილს 3 ივლისის აქციაზე სამართლიანი შეკითხვები გაუჩნდა დემონსტრაციის მიზნებისა და გეგმების შესახებ, აქციის ორგანიზატორებმა კი ვერ შეძლეს, მოქალაქეებამდე მკაფიოდ მიეტანათ სამოქმედო გეგმა და აქციის მიზანი.
„სირცხვილია“ წერს, რომ იდეის გარშემო მაქსიმალურმა ჩართულობამ და ფართო წარმომადგენლობამ ინტერესის დაბალანსების და კონსესუსის აუცილებლობა შექმნა, რამაც შეცდომები და ხარვეზები გამოიწვია.
მოძრაობამ ბოდიში მოიხადა და მოქალაქეებს პირობა მისცა, რომ ვეღარავინ დაემუქრება სახალხო მოძრაობის გამაერთიანებელ სულისკვეთებას.
„სირცხვილიას“ განცხადებას გაეცანით:
„უპირველეს ყოვლისა, უღრმესი მადლობა თითოეულს, ვინც უთვალავი პრობლემის და გასაჭირის მიუხედავად პოულობს ძალას, საქართველოს ევროპული მომავლისთვის იბრძოლოს. თქვენი შეუპოვრობა ისტორიულია.
უმნიშვნელოვანესია, არ დავკარგოთ, რამაც 20 ივნისს 150 ათასი ადამიანი რუსთაველზე მიგვიზიდა – ერის გამაერთიანებელი იდეა – წინ, ევროპისკენ და შინ, ევროპისკენ.
3 ივლისის მასშტაბურმა პროტესტმა საზოგადოების ნაწილს სამართლიანი კითხვები გაუჩინა დემონსტრაციის მიზნებსა და გეგმასთან დაკავშირებით. მაინც რა მოხდა მესამე აქციაზე?
კამპანია „შინ, ევროპისკენ” მაისის მიწურულს დავიწყეთ, მაშინ, როდესაც ჯერ თითქმის არავის სჯეროდა, რომ შესაძლებელი იყო, ხელოვნურად ნაკვები განზიდულობის მიუხედავად, ათი ათასობით განსხვავებულ ადამიანს ძალისხმევა გაგვეერთიანებინა. ვიაზრებდით რა, რომ ეროვნული იდეა ნებისმიერ საინიციატივო ჯგუფზე დიდია, ჩვენ ფართოდ გავხსენით კარი სხვადასხვა სამოქალაქო ჯგუფისა და ორგანიზაციისათვის, რათა ყველას შეძლებოდა, წვლილი შეეტანა ეროვნული ინტერესის დაცვაში.
აგრეთვე დავაწესეთ პროტესტის მკაცრი ტაქტიკური ჩარჩო – არაძალადობრიობა. ჩვენ ახლაც ვრჩებით მაქსიმალური ჩართულობისა და წარმომადგენლობითობის პრინციპის ერთგულნი, მაგრამ იმავდროულად, ვაცნობიერებთ შეცდომებსა და ხარვეზებს, რომლებმაც ბევრი ინტერესის დაბალანსებისა და კონსენსუსის ძიების პროცესში თავი იჩინეს.
ამ მცდელობებმა მიითვისეს ყურადღება, რომელიც მთავარი აქტორისთვის – ხალხისთვის უნდა დაგვეთმო, რათა 3 ივლისის აქციის მიმართ მოლოდინები სწორად გვემართა. ჩვენ ვერ შევძელით, რომ უფრო მკაფიოდ და გასაგებად მიგვეტანა ადამიანებამდე სამოქმედო გეგმა, რათა მათ წინასწარ სცოდნოდათ, რისთვის მოდიოდნენ აქციაზე.
შეკრების თავდაპირველი მიზანი, მთავრობის სხდომის გაუქმება, გადაფარა საორგანიზაციო გუნდს მიღმა შექმნილმა ცრუ მოლოდინმა, რომ ოლიგარქია იმავე დღეს დაემხობოდა და ბრძოლაც დასრულდებოდა.
გულითად ბოდიშს ვიხდით და გპირდებით, აღარაფერს და აღარავის მივცემთ უფლებას, დაემუქროს უამრავი განსხვავებული მოქალაქის გამაერთიანებელ სულისკვეთებას, რომელიც სახალხო მოძრაობამ „შინ ევროპისკენ” ყველაზე მკაფიოდ 20 ივნისს გამოხატა.
ჩვენი ამოსავალი პრინციპი არის მშვიდობიანი, არაძალადობრივი პროტესტი და ჩვენთვის არცერთი მოთხოვნა, პოლიტიკური გემოვნება თუ მისწრაფება არ დგას ეროვნულ იდეაზე – ევროპის კავშირში გაწევრიანებაზე მაღლა. ჩვენ არ უნდა გაგვიფანტოს ყურადღება ვიწროპარტიულმა ინტერესებმა და უნდა ვკონცენტრირდეთ 12 მოთხოვნაზე, რომელიც პირველ რიგში ჩვენ გვჭირდება, შემდეგ კი ჩვენგან – ევროკავშირს.
ჩვენ უნდა დავიცვათ 150 ათასი ადამიანის გამოსვლით გამოხატული იდეა, რომელიც საქართველოს მოსახლეობის 85%-ს აერთიანებს. ჩვენ ვაპირებთ, რომ საშუალო და გრძელვადიანი გეგმები მხოლოდ ევროინტეგრაციის უზენაეს მიზანს დავუკავშიროთ. ეს პროცესი წარმატებით მხოლოდ იმ შემთხვევაში დაგვირგვინდება თუ მასში თითოეული ჩვენგანი ჩაერთვება. გთხოვთ, არ გაანელოთ თქვენში საქართველოს ევროპული მომავლისთვის ბრძოლის სურვილი. ჩვენ გავიმარჯვებთ!“, – წერია განცხადებაში.
3 ივლისს რუსთაველის გამზირზე სახალხო მოძრაობის „შინ ევროპისკენ“ ორგანიზებით მორიგი აქცია გაიმართა.
აქციის ორგანიზატორებმა შეკრებილ მოქალაქეებს განუცხადეს, რომ ღამით მთავრობის ადმინისტრაციის შენობასთან დარჩებოდნენ, მეორე დილას, 4 ივლისს კი 11:00-ზე მთავრობის სხდომის ჩატარებას ხელს შეუშლიდნენ.
4 ივლისს მთავრობის ადმინისტრაციასთან რამდენიმე აქტივისტი დასარტყამი ინსტრუმენტებით, სასტვენებითა და სირენებით იყო შეკრებილი.
მიუხედავად იმისა, მთავრობის პრესსამსახურს იმ დღეს სხდომის ჩატარების შესახებ პრესრელიზი არ გაუვრცელებია, სხდომების ჩატარების პრაქტიკის გათვალისწინებით, არსებობდა მოლოდინი, რომ მთავრობის წევრები კანცელარიაში 11:00-ზე შეიკრიბებოდნენ.
მას შემდეგ, რაც 11 საათზე სხდომა არ დაიწყო, „სირცხვლიას“ ერთ-ერთმა ლიდერმა, შოთა დიღმელაშვილმა გამოაცხადა, რომ მიზანი მიღწეულია და აქცია დაიშალა.
4 ივლისს მთავრობის სხდომა 14:00-ზე ჩატარდა.
