პალესტინელ მებრძოლთა დაჯგუფებამ „ჰამასმა“ შაბათს კიდევ სამი ისრაელელი მძევალი გაათავისუფლა, მაშინ როცა ისრაელმა დაიწყო ათობით პალესტინელის გათავისუფლება ცეცხლის შეწყვეტის შესახებ შეთანხმების ბოლო ეტაპზე.
გათავისუფლებულ მძევლებს შორის არიან ოჰად ბენ ამი და ელი შარაბი, ორივე მძევლად აიყვანეს კიბუც ბეერიდან 2023 წლის 7 ოქტომბერს „ჰამასის“ მიერ განხორციელებული თავდასხმის დროს, ასევე ორ ლევი, რომელიც იმ დღეს გაიტაცეს „ნოვას“ მუსიკალური ფესტივალიდან.
როგორც „როიტერსი“ წერს, ისინი გამოიყურებოდნენ სუსტად, იყვნენ ფერმკრთალები, გამხდრები და უფრო ცუდ მდგომარეობაში, ვიდრე 18 მძევალი, რომლებიც მანამდე გაათავისუფლეს იმავე ზავის საფუძველზე.
მძევლების გათავისუფლების სანაცვლოდ, ისრაელი ათავისუფლებს 183 პალესტინელ პატიმარს, რომელთაგან ზოგიერთი მსჯავრდებულია თავდასხმებში მონაწილეობისთვის, რომელთა დროს ათობით ადამიანი დაიღუპა, ასევე ღაზაში ომის დროს 111 დაკავებულს.
პალესტინის წითელი ნახევარმთვარის სამედიცინო სამსახურმა განაცხადა, რომ დასავლეთ სანაპიროზე გათავისუფლებული 42 ადამიანიდან ექვსი მძიმე მდგომარეობაში იყო და საავადმყოფოებში გადაიყვანეს. ზოგიერთი პატიმარი უჩიოდა არასათანადო მოპყრობას.
ვაშინგტონის, კაიროსა და დოჰას შუამავლობით ცეცხლის შეწყვეტის პირველი 42-დღიანი ეტაპი 19 იანვარს შევიდა ძალაში. შეთანხმების თანახმად, 33 ისრაელელი ბავშვი, ქალი და ავადმყოფი, დაჭრილი და ხანდაზმული მამაკაცი უნდა გათავისუფლდნენ პირველ ეტაპზე, თითქმის 2000 პალესტინელი ტყვისა და დაპატიმრებულის სანაცვლოდ.
მოლაპარაკებები მეორე ფაზაზე დაიწყო ამ კვირაში, რომელიც მიზნად ისახავდა დარჩენილი მძევლების დაბრუნებას და ღაზადან ისრაელის ჯარების სრულ გაყვანაზე შეთანხმებას ომის საბოლოო დასრულებისთვის მოსამზადებლად.
„ჰამასის“ მეთაურობით შეიარაღებული პირები თავს დაესხნენ ისრაელს 2023 წლის 7 ოქტომბერს, რის შედეგადაც 1200 ადამიანი მოკლეს და 250-ზე მეტი მძევლად აიყვანეს, ისრაელის მონაცემებით. საპასუხოდ, ისრაელმა დაიწყო საჰაერო და სახმელეთო ომი ღაზაში, რომელსაც 47000-ზე მეტი პალესტინელი შეეწირა, ღაზას ჯანდაცვის ორგანოების ცნობით, და გაანადგურა ანკლავის დიდი ნაწილი.
