აშშ-ის ვიცე-პრეზიდენტი, კამალა ჰარისი აცხადებს, რომ ჯო ბაიდენის მხარდაჭერის მიღება მისთვის დიდი პატივია.
ჰარისი მადლობას უხდის მოქმედ პრეზიდენტს და აღნიშნავს, რომ ყველაფერს გააკეთებს პარტიის ერთიანობისა და დონალდ ტრამპის დამარცხებისთვის.
„ამ თავდაუზოგავი და პატრიოტული აქტით, პრეზიდენტი ბაიდენი აკეთებს იმას, რასაც აკეთებდა მთელი თავისი სამსახურის განმავლობაში: ამერიკელ ხალხს და ჩვენს ქვეყანას ყველაფერზე მაღლა აყენებს.
ჩემთვის დიდი პატივია პრეზიდენტის მხარდაჭერა და ჩემი მიზანია მოვიპოვო და მოვიგო ეს ნომინაცია [საპრეზიდენტო კანდიდატურა]. გასული წლის განმავლობაში მე ვიმოგზაურე მთელი ქვეყნის მასშტაბით და ვესაუბრე ამერიკელებს ამ მნიშვნელოვან არჩევნებზე. და ეს არის ის, რასაც გავაგრძელებ მომდევნო დღეებში და კვირებში.
ყველაფერს გავაკეთებ, რომ გავაერთიანო „დემოკრატიული“ პარტია, გავაერთიანო ჩვენი ერი დონალდ ტრამპის დასამარცხებლად. არჩევნებამდე 107 დღე დაგვრჩა. ჩვენ ერთად ვიბრძოლებთ. ჩვენ ერთად გავიმარჯვებთ“, – აღნიშნა კამალა ჰარისმა.
ამერიკის პრეზიდენტმა, ჯო ბაიდენმა კანდიდატურა მოხსნა. გავრცელებულ წერილში ბაიდენი აღნიშნავს, რომ ის არ აპირებს ნოემბერში საპრეზიდენტო არჩევნებში მონაწილეობას და სჯერა, რომ ეს ქვეყნის საუკეთესო ინტერესშია.
ბაიდენმა ვიცე-პრეზიდენტ კამალა ჰარისს მხარი ოფიციალურად დაუჭირა და პარტიას შესთავაზა, რომ სწორედ ჰარისი იყოს მათი საპრეზიდენტო კანდიდატი.
„დემოკრატებო – დროა გავერთიანდეთ და დავამარცხოთ ტრამპი. Მოდი გავაკეთოთ ეს”, – დაწერა ბაიდენმა.
