საკოორდინაციო საბჭოს სხდომის დასრულების შემდეგ ბრიფინგზე ჯანდაცვის მინისტრის პირველმა მოადგილემ, თამარ გაბუნიამ ისაუბრა.
მისი თქმით, ჰოსპიტალური სექტორი მობილიზებულია, თუმცა შედარებით დაბალია ჰოსპიტალიზაციის მაჩვენებელი.
„ჰოსპიტალიზაციის პროცესი ამ მიმდინარე პერიოდში არის 12%, რაც შედარებით დაბალია, ვიდრე წინა ტალღების დროს გვქონდა. გარკვეულწილად, ეს მიუთითებს იმას, რომ ვაქცინაციის ფონიდან შესაძლოა, შემთხვევები შედარებით მსუბუქია და ჰოსპიტალიზაცია საჭირო არ არის, თუმცა ჰოსპიტალური სექტორი მობილიზებული რჩება. დაახლოებით 9 000-მდე საწოლი, რომელიც ჩვენ მობილიზებული გვქონდა მეოთხე ტალღის პიკურ პერიოდში, მობლიზებული დარჩა და აქედან დაკავებულია 5 679 საწოლი, დანარჩენი არის თავისუფალი“, – განაცხადა თამარ გაბუნიამ.
საქართველოში კორონავირუსის 5 219 ახალი შემთხვევა გამოვლინდა ბოლო 24 საათში. StopCov.ge-ის ინფორმაციით, გამოჯანმრთელდა 2 348 პაციენტი, ხოლო გასულ დღე-ღამეში გარდაიცვალა 42 ადამიანი.
