ორი უმსხვილესი კომერციული ბანკი საქართველოში, TBC და „საქართველოს ბანკი” გეგმავენ, დაიცვან დასავლური სანქციების მოთხოვნები და არ დაუშვან გამონაკლისი, ეროვნული ბანკის გადაწყვეტილების მიუხედავად.
საქართველოს ბანკი „პუბლიკასთან” აცხადებს:
„ჩვენ ვიცავთ და გავაგრძელებთ აშშ-ის, ევროკავშირის და გაერთიანებული სამეფოს სანქციებთან დაკავშირებული მოთხოვნების დაცვას”.
„თიბისი ბანკმა” „პუბლიკას” უთხრა:
„აშშ-ის, ევროკავშირისა და გაერთიანებული სამეფოს მიერ დაწესებული საერთაშორისო სანქციების შესაბამისობაში ვრჩებით. შეგვეხება თუ არ შეგვეხება [მოგვიწევს აღსრულება თუ არა], სანქციების შესაბამისობაში ვრჩებით. ახლა, როგორც გუშინ, ვართ სანქციების შესაბამისობაში”.
საქართველოს ეროვნულმა ბანკმა 19 სექტემბერს აშშ-ის მიერ დაწესებული სანქციების შესაბამისად ოთარ ფარცხალაძისთვის შეზღუდვების დაწესებაზე გადაწყვეტილება შეცვალა. ფარცხალაძეს ეროვნული ბანკის სანქცია გაუუქმდება, რაც ნიშნავს, რომ მას აღუდგება წვდომა საბანკო სერვისებზე.
