ირმა ჭკადუა: გიორგი რამიშვილის დაკავებას პოლიტიკასთან კავშირი არ აქვს

ადვოკატი ირმა ჭკადუა ამბობს, რომ ბიზნესმენ გიორგი რამიშვილის (ზარალას) დაკავებას „პოლიტიკასთან კავშირი არ აქვს“.

„მოხდა ასეთი გაუთვალისწინებელი შეცდომა. […] არანაირი კავშირი ამ ფაქტს პოლიტიკასთან არ აქვს.

თქვენც ხვდებით ხო ალბათ, რომ პარიზში აეროპორტიდან არ შეიძლებოდა, ჩანთით იარაღი წაეღო. აქ საუბარია შენახვის უფლებით რეგისტრირებულ კანონიერ იარაღზე. […] როგორ მოხდა, რანაირად მოხდა, ამასთან დაკავშირებით მისცემს ჩვენებას გამოძიებას, აუცილებლად გააკეთებს განცხადებას თავად და თქვენთვისაც იქნება ცნობილი“, – თქვა ირმა ჭკადუამ ჟურნალისტებთან.

ბიზნესმენი გიორგი რამიშვილი („ზარალა“) გუშინ, 6 ივლისს დააკავეს.

შსს-ს განცხადებით, 6 ივლისს თბილისის საერთაშორისო აეროპორტში, გამგზავრების ტერმინალში, გ.რ.-ს ხელბარგის სკანერით შემოწმებისას ცეცხლსასროლი იარაღი, მჭიდი და ვაზნები ამოიღეს.

„დადგინდა, რომ აღნიშნული ცეცხლსასროლი იარაღი რეგისტრირებულია გ.რ.-ს სახელზე, თუმცა აღნიშნულ პიროვნებას ტარების უფლება არ ჰქონდა“, – ნათქვამია განცხადებაში.

გამოძიება სისხლის სამართლის კოდექსის 236-ე მუხლის მე-3 და მე-4 ნაწილებით მიმდინარეობს.

236-ე მუხლის მე-3 ნაწილი გულისხმობს:

ცეცხლსასროლი იარაღის [გარდა, სანადირო ან სპორტული იარაღისა], საბრძოლო მასალის, ფეთქებადი ნივთიერების ან ასაფეთქებელი მოწყობილობის მართლსაწინააღმდეგო შეძენა ან შენახვას – ისჯება სამიდან ექვს წლამდე პატიმრობით.

მე-4 ნაწილი:

ცეცხლსასროლი იარაღის, საბრძოლო მასალის, ფეთქებადი ნივთიერების ან ასაფეთქებელი მოწყობილობის მართლსაწინააღმდეგო ტარება, – ისჯება ოთხიდან შვიდ წლამდე პატიმრობით.