ისრაელის თავდაცვის მინისტრმა, ისრაელ კატსმა განაცხადა, რომ ღაზაში „ჰამასის“ წინააღმდეგ სამხედრო შეტევას აფართოებენ და „დიდი ტერიტორიების“ დაკავებას გეგმავენ.
თავდაცვის მინისტრმა თქვა, რომ ტერიტორიები იმ „უსაფრთხოების ზონებს დაემატება“, რომლებსაც სამხედროები ამჟამად ღაზაში ინარჩუნებენ. მან აღნიშნა, რომ გაფართოებული ოპერაცია მოიცავს „ღაზას მოსახლეობის ფართომასშტაბიან ევაკუაციას საბრძოლო ზონებიდან“.
„[სამხედრო გაფართოება] მოიცავს ტერორისტებისა და ტერორისტული ინფრასტრუქტურის განადგურებას და მათგან ტერიტორიის გაწმენდას, ასევე დიდი ტერიტორიების დაკავებას, რომლებიც გაერთიანდება ისრაელის უსაფრთხოების ზონაში“, – განაცხადა კატსმა.
გასულ კვირას ისრაელის პრემიერ-მინისტრმა, ბენიამინ ნეთანიაჰუმ ისაუბრა ომისშემდგომი ღაზას მიმართ მის მოთხოვნებზე.
ნეთანიაჰუ ითხოვს, რომ „ჰამასმა“ იარაღი დაყაროს, ისრაელს მიეცეს სრული კონტროლი ღაზას უსაფრთხოებაზე და განხორციელდეს დონალდ ტრამპის წინადადება ღაზელების მიერ ტერიტორიის მასობრივად დატოვების შესახებ.
„ეს არის გეგმა. ჩვენ ამას არ ვმალავთ. ჩვენ მზად ვართ, ვისაუბროთ ამაზე ნებისმიერ დროს“, – თქვა ნეთანიაჰუმ.
