ბიძინა ივანიშვილს ჟურნალისტებმა ჰკითხეს, რატომ იცვლება პრემიერი ღარიბაშვილი და „რა დაუწუნა მას?”, ივანიშვილი ამბობს, რომ ღარიბაშვილს არაფერს უწუნებს.
„რა უნდა დავუწუნო, ნახეთ როგორი კაცია. ამას რა უნდა დავუწუნო”, – უთხრა ბიძინა ივანიშვილმა ჟურნალისტებს.
ასევე, ჟურნალისტებმა ივანიშვილს ჰკითხეს, ერთი თვის წინ, 30 დეკემბერს რატომ თქვა, რომ პრემიერი არ შეიცვლებოდა და რატომ შეცვალა ახლა, რაზეც ივანიშვილმა უპასუხა: „მან [ღარიბაშვილმა] მოისურვა, მე არ მომისურვებია”.
ბიძინა ივანიშვილი სასტუმრო „პარაგრაფში” მივიდა, სადაც რამდენიმე წუთში „ოცნების” ყრილობაზე ახალ პრემიერს წარადგენენ.
ირაკლი ღარიბაშვილმა 29 იანვარს განაცხადა, რომ პრემიერ-მინისტრის თანამდებობას ტოვებს.
ტელეკომპანია „იმედის” ინფორმაციით, ღარიბაშვილს პოსტზე ირაკლი კობახიძე შეცვლის. ეს ინფორმაცია „ოცნების” რამდენიმე წევრმა დაადასტურა, მათ შორის, არჩილ თალაკვაძემ და მამუკა მდინარაძემ.
