სტრატეგიული რჩევების ექსპერტთა ჯგუფის (SAGE) ექსპერტების შეფასების შემდეგ, ჯანდაცვის მსოფლიო ორგანიზაცია იძლევა რეკომენდაციას ჩინური ვაქცინის – „სინოფარმის“ გამოყენების ნებართვაზე. ჯანმოს დირექტორის ტედროს ადანომ გებრეიესუსის თქმით, მათ დღეს მიიღეს გადაწყვეტილება „სინოფარმის“ ვაქცინას, რომელსაც პეკინის ბიოლოგიური პროდუქტების ინსტიტუტი აწარმოებს, საგანგებო გამოყენების ნებართვა მიეცეს 18+ ასაკის ადამიანებში.
„სინოფარმის“ ვაქცინამდე მსგავსი რეკომენდაცია გაცემული იყო „ფაიზერის“, „ასტრაზენეკას“, „ჯონსონ & ჯონსონის“ და „მოდერნას“ ვაქცინებზე.
ექსპერტები ბოლო პერიოდია მსჯელობენ ჩინური კომპანიების წარმოდგენილ მონაცემებზე, რომლებიც შეეხებოდა მათ მიერ ჩატარებული კლინიკური კვლევების სამივე ფაზას და თავად SAGE-ის საველე ექსპერტების მოკვლევაზე ვაქცინის უსაფრთხოებისა და ეფექტიანობის შესახებ. ვაქცინების შესახებ ფართო განხილვა 29 აპრილს ჯგუფის რიგგარეშე კონფერენციაზე შედგა.
SAGE-ის გადაწყვეტილება მნიშვნელოვანია საქართველოსთვის, რადგან ქვეყანას უკვე შეძენილი აქვს „სინოფარმის“ 100 000 დოზა, ამავე რაოდენობის „სინოვაკის“ ვაქცინა კი საქართველოს ჩინეთის მთავრობამ აჩუქა.
ჯერ კიდევ SAGE-ის გადაწყვეტილებამდე, 4 მაისიდან, საქართველოში სრულწლოვანი მოქალაქეების „სინოფარმით“ აცრა დაიწყო.
რა ვიცით „სინოფარმზე“?
„სინოფარმი“ ინოვაციური მ-რნმ ვაქცინისიგან განსხვავებით, ტრადიციულ მეთოდზეა შექმნილი და იყენებს დასუსტებულ/ინაქტივირებულ ვირუსს. ვაქცინის დიზაინი პეკინის ბიოლოგიური პროდუქტების ინსტიტუტმა შექმნა, მისი კვლევა კი ჩინურმა სახელმწიფო კომპანიამ „სინოფარმმა“ დაიწყო.
კომპანიამ გასულ წელს სამეცნიერო ჟურნალებში გამოაქვეყნა კლინიკური კვლევების პირველი და მეორე ფაზის შედეგები, რომლებიც უფრო მეტად ვაქცინის უსაფრთხოებაზე იძლევა წარმოდგენას. „სინოფარმის“ მიხედვით, ვაქცინის კვლევებმა აჩვენა, რომ უსაფრთხოა და ცდის პირებშიც კორონავირუსის წინააღმდეგ ანტისხეულები გამოიმუშავა.
რაც შეეხება კვლევის მესამე ფაზას, რომელშიც მოქალაქეთა დიდი ჯგუფი ერთვება და უფრო ნათელ წარმოდგენას უკვე ვაქცინის ეფექტიანობაზე იძლევა, ის საჯარო არ ყოფილა. თუმცა, „სინოფარმი“ ირწმუნება, რომ კვლევის შედეგებით ვაქცინის ეფექტიანობა 79.34%-ია. თუმცა, არაბთა გაერთიანებულ საემიროებში, სადაც ჩინურ ვაქცინას იყენებენ იმუნიზაციისთვის, აცხადებენ, რომ მათი კვლევით ვაქცინის ეფექტიანობა 86% იყო.
SAGE-ის სხდომის შემდეგ გამოქვეყნებული მასალებიდან კი ჩანს, რომ „სინოფარმის“ ეფექტიანობა სხვადასხვა ქვეყნის კვლევის მიხედვით, საშუალოდ, 78%-ზე მეტია. თუმცა, „სინოფარმის“ მიერ მისი ვაქცინის ეფექტიანობისა და გვერდითი მოვლენების შესახებ წარდგენილ მონაცემებში დაბალია სარწმუნოების დონე ასაკოვან ადამიანებში.
ასევე, ჯერჯერობით უცნობია, რამდენად ეფექტიანი იქნება „სინოფარმის“ ვაქცინა კორონავირუსის ახალი შტამების წინააღმდეგ.
„სინოფარმით“ აცრისთვის საჭიროა ორი დოზის გაკეთება, რომლებიც 21-28 დღის შუალედით უნდა გაკეთდეს. თუმცა, იყო საუბარი იმაზე, რომ მისი ტრადიციული მეთოდით დამზადების გამო, შესაძლოა რიგ შემთხვევებში მესამე აცრაც გახდეს საჭირო, საკმარისი რაოდენობით ანტისხეულების გამომუშავებისთვის. ინექცია კუნთში კეთდება.
„სინოფარმი“ შენახვის განსაკუთრებულ პირობებს არ საჭიროებს, შესაბამისად, მაგალითად, „მოდერნასა“ და „ფაიზერის“ ვაქცინებთან შედარებით მისი ადმინისტრირება მარტივია.
რაც შეეხება გვერდით მოვლენებს, „სინოფარმი“ მიუთითებს, რომ კვლევის ეტაპზე მოქალაქეებს რთული გვერდითი მოვლენები არ ჰქონიათ. მისი გვერდითი მოვლენები რიგ შემთხვევებში ცხელებით, ნანემსარი ადგილის ტკივილით, თავისა და კუნთების ტკივილით, გულის რევითა და დიარეით გამოიხატა, თუმცა ამ გვერდითმა ეფექტებმა ცდის პირებში თავისით გაიარა და მათ სამედიცინო ჩარევა არ დასჭირდათ.
„სინოფარმით“ არ იცრებიან ორსული და დედები, რომლებსაც ბავშვები ბუნებრივ კვებაზე ჰყავთ, ასევე მძიმე ონკოლოგიური პაციენტები. აცრა არ კეთდება არაკონტროლირებადი ეპილეფსიისა და პროგრესირებადი ნევროლოგიური დაავადებების შემთხვევაშიც.
„სინოფარმის“ ვაქცინა უკვე დამკიცებულია ზოგიერთ ქვეყანაში: არგენტინაში, არაბთა გაერთიანებულ საემიროებში, ეგვიპტეში, თურქეთში, უნგრეთში და ა.შ.
