საქართველოს პრემიერ-მინისტრმა, ირაკლი ღარიბაშვილმა მთავრობის სხდომაზე განაცხადა, რომ კერძო სექტორში დასაქმებულთათვის დეკრეტული შვებულების პერიოდში დახმარება გაომარგდება.
მისი თქმით, კერძო სექტორში დეკრეტული შვებულების დახმარება პირველი იანვრიდან 1000 ლარის ნაცვლად 2000 ლარი გახდება. სკოლის მასწავლებლები კი დეკრეტული შვებულების დროს სრულ ხელფასს მიიღებენ.
„ე.წ. დეკრეტული შვებულებების საკითხი იყო საკმაოდ პრობლემატური, ამის თაობაზე მე პარლამენტშიც მთხოვეს საკითხის გადაწყვეტა, მქონდა ამის თაობაზე მსჯელობა და გადავწყვიტეთ, რომ კერძო სექტორში დასაქმებულებისთვისაც გავაორმაგოთ დახმარება დეკრეტული შვებულების პერიოდში და პირველი იანვრიდან 1000 ლარის ნაცვლად გახდება 2000 ლარი.
ჩვენ მანამდე გახსოვთ, რომ სკოლის მასწავლებლების შემთხვევაში გავითვალისწინეთ ზრდა და მომდევნო წლიდან სკოლის მასწავლებლები დეკრეტული შვებულების დროს სრულ ხელფასს მიიღებენ. ახლა უკვე კერძო სექტორში დასაქმებულებისთვისაც გადავწყვიტეთ და ეს დახმარება 1000 ლარის ნაცვლად იქნება 2000 ლარი”, – განაცხადა ირაკლი ღარიბაშვილმა.
