თბილისის მერის, კახა კალაძის განცხადებით, ტურისტული სეზონის გააქტიურებასთან ერთად აქტუალური ხდება ხმაურის დონის პრობლემა კერძო თუ საზოგადოებრივ სივრცეებში. როგორც კალაძე ამბობს, ხმაურის დასაშვები ნორმების გადამეტებისთვის სანქციები პრაქტიკულად უშედეგოა და არ წარმოადგენს არანაირ ბერკეტს. ამ პრობლემის მოგვარების მიზნით მოამზადეს აკანონმდებლო ცვლილებები, რომელიც ითვალისიწნებს სანქციების გამკაცრებას.
„რა თქმა უნდა, არავის სიამოვნებს სანქციების გამკაცრება, დაწესებული ჯარიმების გაზრდა, თუმცა ძალიან დიდი პრობლემაა ხმაურის გადამეტება ღამის საათებში. ადამიანებს აქვთ სურვილი დაისვენონ, განიტვირთონ და კონკრეტულ უბნებში, კონკრეტულ სივრცეებში არის სერიოზული პრობლემა ხმაურის გადამეტებასთან დაკავშირებით. რა თქმა უნდა, მუნიციპალური ინსპექცია მოქმედებს კანონის ფარგლებში, მაგრამ აღნიშნული სანქციები არ წარმოადგენს არანაირ ბერკეტს. ეს არის ძალიან დიდი პრობლემა.
ჩვენ, რა თქმა უნდა, ბიზნესს არ ვეწინააღმდეგებით და ხელს არავის ვუშლით, მაგრამ ადამიანის უფლებებიც მაქსიმალურად უნდა იყოს გათვალისწინებული და ეს ხმაური, რომელიც ღამის საათებში მათთვის უდიდეს პრობლემას წარმოადგენს, უნდა იყოს მოწესრიგებული“,- განაცხადა კალაძემ.
როგორც კალაძემ განმარტა, კანონპროექტის მიხედვით აკუსტიკური ხმაურის დასაშვები ნორმების გადამეტება პირველ შემთხვევაში, გამოიწვევს ფიზიკური პირის დაჯარიმებას 150 ლარის ოდენობით, ხოლო იურიდიული პირის დაჯარიმებას 1500 ლარის ოდენობით.
იგივე ქმედების განმეორებით ჩადენის შემთხვევაში, ფიზიკური პირი დაჯარიმდება 500 ლარის ოდენობით, ხოლო იურიდიული პირი დაჯარიმდება 5000 ლარის ოდენობით.
მესამე და ყოველ მომდევნო დარღვევაზე ფიზიკური პირი დაჯარიმდება 1000 ლარის ოდენობით, ხოლო იურიდიული პირი 10 ათასი ლარის ოდენობით.
„გვქონდა კონსულტაციები პარლამენტთან, მათთან ერთად გავიარეთ ყველა დეტალი. იმედი მაქვს, კანონპროექტს ექნება მხარდაჭერა, რათა დავიცვათ ჩვენი მოქალაქეების და ამ ქალაქში მცხოვრები ადამიანების უფლებები, მაქსიმალურად დავეხმაროთ, მათ კანონიერი უფლება აქვთ 23:00 საათის შემდეგ დაისვენონ, განიტვირთონ“,- განაცხადა კალაძემ.
