თბილისის სახელმწიფო უნივერსიტეტის სტუდენტებს აცნობეს, რომ ხვალ ვაკის ტერიტორიაზე მდებარე კორპუსებში დაგეგმილი სააუდიტორიო ან სხვა ტიპის მეცადინეობები ერთი დღით შეჩერდება.
სტუდენტებს ინფორმაცია შეტყობინების სახით დაეგზავნათ. მიზეზად „ჭავჭავაძის გამზირის გადაკეტვა/ტრანსპორტის მოძრაობის შეზღუდვა” სახელდება. ადმინისტრაციის ცნობით, დაგეგმილი საგამოცდო პროცესი (თსუ ბიბლიოთეკის კორპუსი) წარიმართება განსაზღვრული გრაფიკით.
ინფორმაცია „პუბლიკას“ დაუდასტურეს თსუ-ის პრესასთან ურთიერთობის სამსახურშიც. მათი განმარტებით, სასწავლო პროცესის შეჩერება არ შეეხება მაღლივის კორპუსებს.
მას შემდეგ, რაც ოპოზიციამ თსუ-სთან 24-საათიანი აქცია დააანონსა, უნივერსიტეტის პირველი კორპუსის მიმდებარე ტერიტორია გადაიკეტა – მოძრაობა შეზღუდულია ჭავჭავაძის გამზირზე, ვარაზისხევზე, კეკელიძისა და მელიქიშვილის ქუჩებზე. ადგილზე გაშლილია კარვები, მოქალაქეებს მიტანილი აქვთ პლედები და „პარალონები“.
