,,ქართული ოცნების” თავმჯდომარე ირაკლი კობახიძე აშშ-ის ახალი ელჩის, რობინ დანიგენის მიღების შემდეგ ამბობს, რომ ახალ ელჩთან მჭიდრო თანამშრომლობის იმედი აქვს.
კობახიძის განცხადებით, აუცილებელია, რომ აშშ-სთან მჭიდრო პარტნიორობა გაღრმავდეს.
,,დავესწარით აშშ-ის ელჩის მიღებას. გვქონდა საუბარი და შეხვედრა. ძალიან დიდი იმედი გვაქვს, რომ ახალი ელჩის პირობებში სერიოზულად გაღრმავდება პარტნიორობა საქართველოსა და აშშ-ს შორის. გვაქვს ოპტიმიზმის ძალიან მყარი საფუძველი და ველოდებით მჭიდრო თანამშრომლობას ახალ ელჩთან… სიღრმეში ვერ შევალთ, მაგრამ გვაქვს ყველანაირი საფუძველი, რომ ოპტიმისტურად ვიყოთ განწყობილი თანამშრომლობის შემდგომ გაღრმავებასთან დაკავშირებით და დარწმუნებული ვარ, რომ ასე იქნება. ჩვენი მხრიდან გაკეთდება ყველაფერი, რათა ახალ ელჩთან შედგეს მჭიდრო თანამშრომლობა, რაც არის აუცილებელი, რომ გაღრმავდეს ჩვენი მჭიდრო პარტნიორობა ამერიკის შეერთებულ შტატებთან”, – განუცხადა ჟურნალისტებს კობახიძემ.
აშშ-ის ელჩი საქართველოში, რობინ დანიგენი შეხვდა პოლიტიკოსებს, როგორც ,,ოცნებიდან”, ასევე ოპოზიციიდან. მიღება გაცნობითი ხასიათის იყო. დანიგენი საქართველოში 12 ოქტომბერს ჩამოვიდა.
